Улс төрийн намын урдаа барьдаг Улаан тойргууд

Хэд хэдэн сонгуулийн нүүр үзэж хиртсэн “улаан” тойргууд бий. Хиртсэн улаан тойрог гэдэг нь муулж байгаа юм биш онцолж байгаа хэрэг. Жишээ дурдахад Төв, Булган тэргүүтэй нилээдгүй хэдэн аймгуудад л гэхэд өмнөх сонгуулиудад АН огтхон ч ялж үзээгүй байх юм. Яахав тэр жилийн сонгуульд  До.Ганболд тэргүүтэй хэсэг нөхдүүд намдаа ялалт авч ирснийг эс тооцвол Төв аймагт ахиж ардчилал гэдэг үг нэг ч цухалзаагүй бизээ.

Сүүлийн хоёр сонгуулийн үр дүнг харахад  дандаа хуучин ХУ буюу одоогийн МАН ялалт байгуулж байсан байх юм. Булган ч мөн ялгаагүй. Энэ жил харин сонгуулийн хуулийн дагуу цөөхөн мандат хуваарилагдсан. Гэсэн хэдий ч дархан аваргууд тухайн тойргууддаа үлдэж хоцорчээ. 14-р тойрогт гэхэд М.Энхболд, Су.Батболд нар голомтоо сахин үлдэж ахин хүч үзэхээр нэр дэвшээд буй.

Эдгээр эрхмүүдийн хувьд хийсэн ажилтай, хэлэх үгтэй тойрогтоо чамгүй их хөрөнгө оруулалт хийчихсэн туршлагатай парламентчид. Тэдний гол өрсөлдөгчид нь АН-аас нэр дэвшигч Д.Доржпүрэв, Го.Баярсайхан нар. Д.Доржпүрэвийн хувьд өмнө нэг сонгуульд ялагдаад үзчихсэн сэтгэлзүйн хувьд бэлтгэл сайтай нэр дэвшигч. Ялалт байгуулах магадлал өндөртэй гэж тус тойргийнхон ярьдаг. Харин Го.Баярсайханы хувьд нэг их олонд танигдаагүй нэгэн. Тиймээс энэ тойрогт дархан аваргууд даваа авах магадлалтай.

Дараачийн улаан тойрогт МАН-аас нэр дэвшигч БСШУ-ын сайд Ё.Отгонбаяр. Сайдын хувьд гишүүн болж үзээгүй ч төрийн том яамыг амжилттай удирдаж яваа. Тэр ч бүү хэл боловсролын салбарт шинэчлэл хийж “кээмбэрээж” боловсрол гэгчийг хэрэгжүүлж эхэлсэн. Түүний өрсөлдөгчид нэг их угшилгүй ч тойрогтоо нэр хүнд сайтай хүмүүс бий. Гэхдээ сайд маань ганцаараа торойн гарч ирж тасархай түрүүлж мэдэхээр байгаа. Ядахдаа Булганы тойрог энэ сонгуульд ганцхан мандаттай.

Ингээд бодохлоор энэ жилийн сонгуульд зарим тойргууд өнгөө солихгүй ч юм шиг. Улстөрийн намын урдаа барьдаг улаан тойргуудыг эргэн сурвалжлах болно.

А.ТЭМҮР