Хүүхдийн паркад хүчтэй өрсөлдөгч хэрэгтэй байна

Паркад хүүхдээ тоглуулах талаар бодоод ч хэрэггүй

Тун удахгүй хүүхдийн баяр тохиох гэж байна. Жилд ганцхан тохиох баяраараа хүүхэд хөөрөн цэнгэж, хүссэн бүхнээ хийхийг хүсдэг. Алдрай бяцхан үрсээ энэ л өдөр аз жаргал мэдрүүлэхийн тулд эцэг, эхчүүд чадах чинээгээрээ л зүтгэдэг. Бэлэг авч өгнө, бас гадуур дагуулж, дуртай газраар нь оруулдаг уламжлал буй. Харамсалтай нь бяцхан үрсээ тоглуулчих газар хомс. Ямар ч сонголтгүйгээр "Үндэсний соёл амралтын хүрээлэн" буюу олны нэрлэдгээр “Хүүхдийн парк”-ыг зоригсод зургаадугаар сарын 1-нд Улаанбаатарт хаа сайгүй хөвөрнө. Монополь болсон тус газар нь үнээ тэнгэрт хадааж, хүүхдүүдийн хорхойг улам хүргэнэ. Хүссэн тоглоомон дээр нь хүүхдээ тоглуулахын тулд эцэг, эхчүүд хамаг мөнгөө барж дуусна. Ийм л дүр төрх Эх үрсийн баяраар буй болдог нь үнэн.. Хүүхдээ парк дээр тоглуулахад  нэг өрхөөс дунджаар хэдэн төгрөг зарцуулагдах тооцоог хийж үзье.

Хоёр хүүхэдтэй айл байя гэж бодъё. Аав, ээжтэйгээ хамт Парк руу нэвтрэхийн тулд орох тасалбарыг 1000 төгрөгөөр авна. Тэгэхээр дөрвөн ам бүлтэй айл 4000 мянган төгрөг өгснөөр парк руу орох эрх нь бүрдэх нь ээ.  

Паркийн нэг тоглоомын үнэ 4-6 мянган төгрөгийн хооронд бөгөөд тоглоомын багцууд 10-25 мянган төгрөг  байгаа юм.  Тэгэхээр нэг хүүхдээ дунджаар 4 тоглоомон дээр суулгая гэвэл 20 орчим мянган төгрөг болно. Нэг хүүхэд 20 мянга гэхээр 2 хүүхдийнх 40 мянган төгрөг болно.

Бас болоогүй, хүүхэд л юм хойно, элдэв янзын юм нэхнэ, үлээсэн шаарнаас эхлээд уух ундаа зэргийг нь авч өгнө. Ингээд тооцоод үзэхээр орох тасалбар 4 мянгаас эхлээд тоглоомын 40 мянга бусад хэрэглээ гээд хоёр хүүхэдтэй айл паркад хүүхдээ тоглуулахад хамгийн багадаа 50 мянган төгрөг орох нь ээ. Энэ тооцоон дээр түшиглээд  бодохоор гурван хүүхэдтэй айл 75 мянга, дөрвөн хүүхэдтэй айл 80 мянга гээд үржих жишээний.

Ингээд бодохоор дундаж орлоготой айл өрх Хүүхдийн паркад хүүхдээ хүссэнээр нь тоглуулах боломж хомс байгаа биз. Хүүхдийн 20 мянгаа хүлээж амьжиргаагаа залгуулдаг айл өрхүүд бол паркад хүүхдээ тоглуулах талаар бодоод ч хэрэггүй. Хатуу боловч энэ үнэн. Хүүхдийн баяраар хүүхэд бүр хүссэн газраа тоглох боломж нь хомс байгаа нь харамсалтай.

Л.Чинбатын санаачлагыг алга ташин дэмжье

Өрсөлдөгчгүйгээр оршин тогтнож байгаа давуу байдлаа "мөнгө олох хэрэгсэл" мэтээр ойлгож байгаа Хүүхдийн паркийнханд хүчтэй өрсөлдөгч хэрэгтэй байна. Яг л энэ цаг үед Монгол Улсын Хөдөлмөрийн баатар "Гацуурт" компанийн захирал Л.Чинбат олон нийтийг алга ташуулсан нэгэн мэдэгдэл хийлээ. Тэрбээр өөрийн сошиал хуудастаа

" Сүүлийн үед «Үндэсний Цэцэрлэгт Хүрээлэн»-г худалдааны төв болгосон байна гэдэг шүүмжлэл цөөнгүй үзэгдлээ. Үүнтэй холбогдуулаад нэгэн санаачлага дэвшүүлж байна.

Надад зөвшөөрөл өгөөч хотын даргаа! Үндэсний цэцэрлэгт хүрээлэнд хүүхэд бүр үнэ төлбөргүй тоглох дэлхийн жишгийн тоглоомын талбай байгуулах зөвшөөрөл өгөөч. Хотоос, улсаас нэг ч төгрөг гаргахгүй бүх хөрөнгө зардлыг нь хувиасаа дааж нийт нялх үрсээ баясгах боломж олгооч. Өнөөдөр тоглох хүүхэд өсөж том болоод өөрийн хүүхдээ тоглуулдаг урт настай, өндөр чанартай багачуудын байгууламжийг хувийн хэвшлийнхэн бид бүтээе. Бид ажлыг нь ч тэр, арчилгааг нь ч тэр бүгдийг нь хийнэ харин танаас ганцхан гарын үсэг л хүсэж байна. Ойлгож дэмжинэ гэдэгт эргэлзэхгүй байна.

Иргэн Л.Чинбат" хэмээжээ. Хүний төлөө, хүүхдийн төлөө ийм сайхан санаачлага гаргасан түүнд талархах хүн олон байна. Харин түүний эл санаачлагыг эрхэм хотын дарга хэрхэн шийдэхийг хүлээх л үлдлээ. Ирээдүй хойчийнхоо төлөө гаргасан энэ мэт санаачлагыг Су дарга дэмжихгүй байх шалтгаан үгүй санагдана. Магадгүй манай дарга нар атгаг санаа, арчаагүй бодолдоо хүлэгдээд иргэн Л.Чинбатын хүсэлтийг хүлээж авахгүй бол олон нийтийн дунд онигоо болох нь гарцаагүй биз ээ. 

С.Баяр

Эх сурвалж: ZINDAA.MN