СҮХБААТАР: Аймгийн аварга шалгаруулах өсвөрийн шатарчдын тэмцээн боллоо

2019 оны 01 сарын 11

Аймгийн аварга шалгаруулах 2019 оны өсвөрийн шатарчдын тэмцээн болж өндөрлөлөө. Баруун-Урт сумын ИТХ-ын ивээл дор тав дахь жилдээ зохион байгуулагдаж буй тус тэмцээнд таван сум, 16 байгууллагын 150 гаруй өсвөрийн шатарчин оролцов. Тэмцээнд оролцож буй 150 тамирчны 19 нь монголын шатрын холбооны чансаа өндөртэй тамирчид  бөгөөд Дэлхийн шатрын холбооны дэд мастер С.Тамир, спортын дэд мастер Н.Наран-Эрдэнэ, өсвөр үеийн тив болон улсын аварга шалгаруулах тэмцээний медальтай найман тамирчин байгаа нь энэхүү тэмцээний чансааг илтгэж байлаа.

 

Сүхбаатар аймгийн баг тамирчид 2013, 2017 онуудад багаараа улсын аварга болсон. Мөн энэхүү ААШТ-тэй зэрэгцэн БНХАУ-д болж буй сонирхогчдын Азийн аварга шалгаруулах нээлттэй шатрын тэмцээнд Оюунлаг шатрын клубын тамирчин А.Эрхэмбаяр Монгол Улсаа төлөөлөн оролцож байгаа нь тус аймагт оюуны спорт хэрхэн хөгжиж буйн томоохон илрэл юм” гэдгийг Оюунлаг шатрын клубын багш Г.Энхбаатар тэмцээний нээлтийн үгэндээ онцлов. Зургаан насны ангилалд, эрэгтэй эмэгтэй төрөлд нийт 36 тамирчин байр эзэлж, тус бүр улсын аварга шалгаруулах тэмцээнд оролцох эрх авсан юм.

 

“Аймгийн Биеийн тамир спортын газрын төлөвлөгөөт ажлын дагуу ААШТ-ий анхдугаар тэмцээн 8, 9-ний өдрүүдэд амжилттай болж өндөрлөлөө. Шатар бол оюуны спорт, тэр утгаараа ямар нэгэн будлиан маргаангүй сайхан болж өндөрлөсөнд зохион байгуулагчид талархалтай байгаа. Энэ тэмцээнийг өмнө нь аль нэг сургуулийн зааланд хийдэг байсан бол энэ жил зориуд спортын ордондоо, тамирчиддаа зориулан хуваарилсан суудалтайгаар хийж байгаа нь онцлог байна. Бас тэмцээний оролцогчдын тоо болоод чансаа үнэхээр дээшилсэн байна” гэж БТСГ-ын ахлах дасгалжуулагч Ц.Ганбат хэллээ.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top