Д.Лүндээжанцан УИХ-ын гишүүдийг хуралдаа суухыг шаардав

УИХ-ын Төрийн байгуулалтын байнгын хорооны өнөөдрийн хуралдааныг 11:00 цагт зарласан ч ирц бүрдэхгүй байна. Тус байнгын хорооны дарга Д.Лүндээжанцан ирц бүрдэхийг нэг цаг хүлээсний эцэст гишүүдийг хуралдаа оролцохыг шаардаад "Манай байнгын хорооны хурал тасалдаж байсан түүх бахйгүй. Ирц бүрдэх бүрэн боломжтой байна" гэсэн юм.

Төрийн байгуулалтын байнгын хорооны хуралдаан 11.00 цагаас “Жанжин Д.Сүхбаатар” танхимд: 

• “Зарим албан тушаалтны цалингийн хэмжээ тогтоох тухай” Улсын Их Хурлын тогтоолын төсөл /Засгийн газар 2019.04.09-ний өдөр өргөн мэдүүлсэн, хэлэлцэх эсэх/;
• “Цалингийн хэмжээг тогтоох итгэлцүүр батлах тухай” Улсын Их Хурлын тогтоолын төсөл /Засгийн газар 2019.04.09-ний өдөр өргөн мэдүүлсэн, хэлэлцэх эсэх/;
• МҮОНРТ-ийн удирдах зөвлөлийн гишүүнийг томилох тухай асуудал;
• Монгол Улсын Төрийн албаны зөвлөлийн 2018 оны үйл ажиллагааны тайлан.

Төрийн байгуулалтын байнгын хороо нь 19 гишүүнтэй бөгөөд байнгын хорооны гишүүн С.Бямбацогт орон нутагт, О.Баасанхүү гишүүн гадаадад томилолттой байгаа бол Д.Хаянхярваа гишүүн албан уулзалттай байгаа аж. Иймд Ж.Мөнхбат, Н.Амарзаяа, Б.Жавхлан, Б.Наранхүү, О.Содбилэг гишүүдийг хуралдаа суухыг Байнгын хорооны дарга шаардаж байлаа.