13 давхраас унаж нас барсан охины задлан шинжилгээний хариу өнөөдөр гарна

Өнгөрсөн дөрөвдүгээр сарын 9-10-нд шилжих шөнө нийслэлийн Баянзүрх дүүргийн 16 дугаар хорооны нутаг дэвсгэрт байрлах орон сууцны хорооллын 13 давхраас 22 настай эмэгтэй Ц унаж нас барсан харамсалтай хэрэг гарсан.

Уг хэргийн сэжигтнээр түүний найз залуу н.Боргил гэгчийг татан шалгаж байгаа ба хэргийг Баянзүрх дүүрэг дэх Цагдаагийн нэгдүгээр хэлтсээс мөрдөн шалгах ажиллагааг үргэлжлүүлэн явуулж байна. Талийгаачийн ар гэрийнхний зүгээс охины үхлийг гадны нөлөөтэй гэж үзэж байгаа ба шүүх эмнэлгийн дүгнэлт хуулийн дагуу өнөөдөр /2019.05.01/ гарах ёстой юм.

Энэ талаар талийгаач охины аав Д.Сүхжаргалаас тодрууллаа.

-Мөрдөн шалгах ажиллагаа ямар шатанд явж байна вэ?

-Цагдаагийн байгууллагаас хэргийг үргэлжлүүлэн шалгаж байна гэдэг мэдээллийг л өгч байна. Ямар ч байсан хэрэгт холбоотой гэсэн хүмүүсээ шалгаж байгаа гэсэн. Хэрэг гарахаас өмнө н.Боргил манай охиныг зодож, дарамталдаг байсан талаар бүх баримтыг байцаагчид өгсөн байгаа.

-Шүүх эмнэлгийн дүгнэлт өнөөдөр гарах уу?

-Ах нь дөнгөж өчигдөр цагдаа, прокуроруудтай нь уулзсан. Хуулийнхаа дагуу шүүх эмнэлгийн дүгнэлт өнөөдөр гарах ёстой. Энэ дүгнэлтийг бид нар ч тэр, мөрдөгч нар ч хаа хаанаа хүлээж байна. Энэ дүгнэлтээс л бүх зүйл шалтгаалах болоод байна.

-Хэргийн сэжигтэн н.Боргил батлан даалтад байгаа хэвээрээ юу?

-Тийм ээ. Анх л 72 цаг саатуулсан. Түүнээс хойш батлан даалтад гаргасан хэвээрээ байна. Сул чөлөөтэй яваа тэр хүн миний охиныг өөрөө амиа хорлосон болгох гэж гадуур ярьж яваад байна. Тийм болохоор мөрдөн байцаагч болон прокурорт нь н.Боргилд таслан сэргийлэх арга хэмжээ авч өгнө үү гээд өргөдөл өгчихсөн явж байна. Одоо шинжилгээний хариуг л хэрхэн гарахыг хүлээж байна.

Шалгалтын явцад талийгаачийн найз залуу болох сэжигтэн н.Боргил нь архи, согтууруулах ундааны зүйл хэрэглэсэн байсан нь тогтоогдсон бөгөөд түүний мэдүүлгүүд өнгөрсөн хугацаанд гурван ч удаа өөрчлөгдсөн гэдгийг эх сурвалж мэдээлж буй юм.

Хамгийн анхны мэдүүлгээр тэрбээр “Хэрэг болохоос өмнө эхлээд маргалдсан. Гал тогооны өрөөнд ус уугаад зогсож байхад өөрөө цонхоор үсэрчихсэн” хэмээж байсан бол хоёр дахь удаагийн мэдүүлгээр “Би талийгаачтай муудалцсан. Хэрүүл хийхгүй гээд компьютер тоглоод сууж байтал нөгөө өрөөний цонх дуугарсан, очоод хартал уначихсан байсан” хэмээж байжээ. Түүнчлэн сэжигтнийг гадуур байцаах явцад тэрбээр өмнөх мэдүүлгээсээ буцаж “Тухайн үед болсон үйл явдлыг нэг бүрчлэн санахгүй байна” гэжээ.