Сүхбаатар аймагт тарвага нутагшууллаа

Сүхбаатар аймгийн Засаг даргын 2016-2020 оны үйл ажиллагааны мөрийн хөтөлбөрт тусгагдасны дагуу орон нутгийн төсвийн хөрөнгө, Байгаль хамгаалах нөхөн сэргээх арга хэмжээний санхүүжилтээр аймгийн Байгаль орчин, аялал жуулчлалын газраас зарим сумдад Монгол тарвага нутагшууллаа. Сүхбаатар аймгийн Мөнххаан, Түмэнцогт, Сүхбаатар, Эрдэнэцагаан, Дарьганга сумдад 100 толгой Монгол тарвага нутагшуулсан байна.

Аймгийн хэмжээнд өмнө нь 2011, 2012 онуудад Хэнтий аймгийн Норовлин, Батноров сумдын зааг нутгаас тарвага сэргээн нутагшуулж байсан бол энэ удаад Төв аймгийн нутаг Хустайн Байгалийн цогцолбор газраас дахин тарвага сэргээн нутагшуулах ажлыг зохион байгуулсан нь энэ юм.