ҮНДСЭН ХУУЛИАС гадна ЗЭЭЛИЙН асуудлыг хэлэлцэнэ

УИХ-ын 2019 оны хаврын ээлжит чуулганы хэлэлцэх асуудлын дарааллаас харахад энэ долоо хоногт Үндсэн хуулийн нэмэлт, өөрчлөлтийн төсөл, түүнийг тойрсон хэлэлцүүлгүүд анхаарлын төвд байх нь. Мөн цаг үеийн шаардлагатай асуудлууд буюу хэд хэдэн зээлийн хэлэлцээрийн асуудлыг чуулганаар хэлэлцэхээр төлөвлөжээ.

УИХ-ын дарга чуулганы нэгдсэн хуралдааныг мягмар гаргаас эхлэн хуралдуулахаар зарласан бөгөөд Үндсэн хуулийн нэмэлт, өөрчлөлт бол нийгмийн зөвшилцлийн гэрээ гэдгийг онцлоод “УИХ дахь цөөнхийн зөвлөлөөс төслийн үзэл баримтлалын талаар санал, дүгнэлтээ танилцуулах хүсэлт ирүүлснийг хүлээн авсан, түүнчлэн Монгол Улсын Ерөнхийлөгчийн байр суурь, үзэл бодлоо илэрхийлэх бололцоог хангах зорилгоор Үндсэн хуулийн хэлэлцүүлгийг мягмар гарагт хийнэ” гэсэн юм.

Чуулганы нэгдсэн хуралдаанаар хэлэлцэх асуудлын дараалал:

• Монгол Улсын Үндсэн хуульд оруулах нэмэлт, өөрчлөлтийн төсөл /Улсын Их Хурлын гишүүн Д.Лүндээжанцан нарын 62 гишүүн 2019.06.06-ны өдөр өргөн мэдүүлсэн, нэг дэх хэлэлцүүлэг явуулах, үргэлжилнэ/.
• Монгол Улсын Засгийн газар, Азийн хөгжлийн банк хооронд байгуулсан “Санхүүжилтийн ерөнхий хөтөлбөр” соёрхон батлах тухай хуулийн төсөл /Засгийн газар 2019.06.14-ний өдөр өргөн мэдүүлсэн, соёрхон батлах/;
• Уур амьсгалын ногоон сангийн хөнгөлөлттэй зээлийн хөрөнгөөр хэрэгжүүлэх “Улаанбаатар хотын төлбөрийн чадварт нийцсэн ногоон орон сууц ба дасан зохицох чадвар бүхий хотын шинэчлэл төсөл”-ийн Зээлийн хэлэлцээр соёрхон батлах тухай хуулийн төсөл /Засгийн газар 2019.06.14-ний өдөр өргөн мэдүүлсэн, соёрхон батлах/;
• Экспортын зээлийн тухай Монгол Улсын Засгийн газар, Бүгд Найрамдах Беларусь Улсын Засгийн газар хоорондын ерөнхий хэлэлцээрийг соёрхон батлах тухай хуулийн төсөл /Засгийн газар 2019.06.14-ний өдөр өргөн мэдүүлсэн, соёрхон батлах/;
• Монгол Улсын Засгийн газар, Европын сэргээн босголт, хөгжлийн банк хооронд байгуулсан "Санхүүжилтийн ерөнхий хэлэлцээр"-ийг соёрхон батлах тухай хуулийн төсөл /Засгийн газар 2019.06.14-ний өдөр өргөн мэдүүлсэн, соёрхон батлах/;