Төрсний дараах сэтгэл гутрал

ЭХИЙН СЭТГЭЛ ЗҮЙ ХҮҮХДИЙН СЭТГЭЛ ЗҮЙН ХӨГЖИЛД ЧУХАЛ НӨЛӨӨТЭЙ

Шинэ ээжүүдийн 20-иос илүү хувь нь төрсний дараах сэтгэл гутралд автдаг байна. Төрсний дараах эхний сард сэтгэл зүйн тогтворгүй байдал, амархан уурлах, амархан гомдох, сэтгэлээр унах, шалтгаангүй гуниглах зэрэг шинж тэмдгүүд элбэг тохиолддог. Эдгээр шинж нь дутуу нойр, төрөх үеийн хүндрэл, гормоны өөрчлөлт, шарх гүйцэд эдгээгүй байх зэргээс шалтгаалах нь бий.

Гэвч энэ байдал хэтэрхий удаан үргэлжилбэл аюултай. Ээжүүд маань энэ талаар хэн нэгэн ойр дотнын хүндээ дэлгэхээс эмээн дотроо шаналсаар явдаг бөгөөд энэ нь өөрийн болоод хүүхдийнх нь эрүүл мэндэд муугаар нөлөөлөх тохиолдол цөөнгүй байдаг учир энэ талаар ойлголттой байж энэ нь хэвийн үзэгдэл юм гэдгийн хүлээн зөвшөөрөх хэрэгтэй байдаг.

Нярай хүүхдийн сэтгэл зүйн хөгжил төрсөн цагаас эхлэн 1 нас хүртэл хамгийн эрчтэй явагддаг бөгөөд амьдралынхаа туршид сэтгэл санаа тайван тогтвортой байхад чухал нөлөөг үзүүлдэг. Эхний жил дэхь сэтгэл зүйн хөгжилд хамгийн их нөлөө үзүүлдэг хүн бол эх байдаг. Эхийн хайр халамжийг нярай эхийнхээ нүүр царай, халамж энхрийллээс хүлээн авдаг билээ.

Эх сэтгэл санаагаар унах, ядрах, гуниглах, уцаарлах гэх мэт сөрөг сэтгэл хөдлөл нь дөнгөж төрсөн нярайн сэтгэл зүйн хөгжилд сөрөг нөлөөг авчирдаг тул төрөөд удаагүй байгаа эмэгтэйчүүд сэтгэл санааны байдлыг анзаарах, тайван байх сэтгэл гутарч байгаа эсэхэд санаа тавих нь чухал байдаг.

ГЭРТЭЭ ХҮҮХДЭЭ АСРАХ НЬ ХАМГИЙН ТОМ ХӨРӨНГӨ ОРУУЛАЛТ ЮМ

Хүүхдээ хайр халамжаар өсгөн гэртээ суугаа эхчүүд үнэндээ хамгийн том хөрөнгө оруулалтыг хүүхдэдээ хийж байгаа юм. Үүнийг бид байшингийн суурьтай холбогдуулан зүйрлэх юм бол хүүхдийнхээ сэтгэл зүйн хөгжлийн хамгийн чухал суурийг тавьж байгаа үе гэж ойлгох нь зүйтэй. Энэ үе эцэг эхчүүдийн хувьд хэдий амаргүй үе ч гэсэн хамтдаа давж гарах хэсэгхэн үе юм. Тиймээс ялангуяа эхчүүдийн хувьд хүүхдээ дор хаяж 1 жилийн хугацаанд болж өгвөл 2 нас хүртэл нь өөрөө харж өсгөх нь чухал юм.

ТӨРСНИЙ ДАРААХ СЭТГЭЛ ГУТРАЛ ЯАГААД ТОХИОЛДДОГ ВЭ?

Төрсний дараа эмэгтэйчүүдийн даавар болох Эстроген болон Прогестроны ялгаралт эрс багасдаг бөгөөд энэ нь хүний сэтгэл санааг өөдрөг болгодог Серитонин (Аз жаргалын гормон гэж зарим хүмүүс нэрлэдэг) болон Неоадерналин мэдрэлийн эс дамжуулагч буурахад нөлөөлдөг учир сэтгэлээр амархан унахад хүргэдэг.

Серитонин дутагдах үед сэтгэл дүнсгэр, түгшүүртэй, паникт орох, айдас, хоолны дуршил ихсэх гэх мэт шинж илэрдэг бол неоадерналин дутагдах үед сэтгэл дүнсгэр, анхаарал төвлөрөхгүй байх, ой тогтоолт муудах, мэдээллийг удаан хүлээж авах, ядарч сульдах шинж тэмдэг илэрдэг. Дээрх шинж тэмдэг 2-3 долоо хоног үргэлжлэн хэвийн болдог.

Төрсөн эмэгтэй бүрт гутрал явагддаггүй ба гутралын хэр хэмжээ харилцан адилгүй байдаг. Хэрвээ удаан хугацаанд 4-өөс дээш 7 хоног үргэлжлэн байнга уурлаж уцаарлах, нойргүйдэх, их уйлах, эцэж ядрах, буруутгал мэдрэх, амьдрах утгагүй мэт санагдах, итгэл найдваргүй болох гэх мэт шинж тэмдэг илэрвэл мэргэжлийн сэтгэл зүйчид хандах нь зүйтэй.

СЭТГЭЛ САНААГ ТАЙВАН ӨӨДРӨГ БОЛГОХ НАТУРАЛ ШИЛДЭГ АРГА ЮУ ВЭ?

Стресс ядаргааг тайлахад хамгийн шилдэг арга дасгал хөдөлгөөн байдаг, дасгал нь серитонин ялгаралтыг ихэсгэж сэтгэл санааг өөдрөг болгодог. Судалгаагаар аэробик нь сэтгэл гутралыг багасгах нөлөөтэй гэдгийг баталжээ.

Мэдрэлийн эс дамжуулагчдын ялгаралтыг ихэсгэхэд бас нэг нөлөөтэй зүйл бол Fish Oil буюу Омега 3 байдаг тул өдөрт 1 удаа уух нь тустай.

Ойр дотнынхондооөөрийнхөө сэтгэл санааг нээлттэй хуваалцах, адилхан хүүхэд гаргасан эхчүүдтэй найзалж нөхөрлөх, нөхөртэйгөө болзох зэрэг нь тустай.

НӨХРҮҮДЭД ӨГӨХ ЗӨВЛӨМЖ:

-Сэтгэл гутралаас эхнэрээ аврах бүхий л аргыг авч хэрэгжүүлэх хэрэгтэй
-Эхнэрийнхээ нуруунд байгаа ачааллыг хуваалцах, гэр ахуйн ажилд нь туслах
-Ямар их жин нэмсэн талаар, бас хэзээ эргэж хэвэндээ орох талаар нь
"ЯРЬЖ" хөндөхгүй байх
-Нөхөр хүн эхнэрийнхээ хамгийн сайн ярилцагч, сонсогч, дотнын найз нь байж
чаддаг(төрсний дараа 30 хоног "ХӨЛ ХОРИХ" явдал нь эхийн сэтгэл
санаанд хэрхэн сөргөөр нөлөөлж болох талаар эргэцүүлэн бодох)
-Ямар ч шалтгааныг хайлгүйгээр эхнэртээ гэнэтийн бэлэг барих, болзоонд урих гэх
мэт "БҮТЭЭЛЧЭЭР" хандах

Учирч болох сөрөг үр дагаврууд:

• Сэтгэл гутралыг засахгүй бол эх хүн өөртөө болон хүүхдэдээ санаанд оромгүй
байдлаар сөргөөр хандаж эхлэх
• Үргэлж золгүй байдлыг зөгнөж бодох, улмаар ярьж эхлэх
• Байнгын сэтгэл түгшүүртэй болох
• Эхнэрийн сэтгэл гутралын даамжрал нөхөрт ч гэсэн нөлөөлөн гэр бүлийн
"УУР АМЬСГАЛ" хүйтэн хөндий болох аюултай.
• Улмаар эх хий зүйл харах, дэмийрэх гэх мэтийн сэтгэцийн гүн эмгэгтэй болох

Надад болон манай гэр бүлд энэ зүйл тохиолдохгүй гэж хайнга хандахгүй байхыг бүх
ээжүүдэд зөвлөмөөр байна. Шаардлагатай тохиолдолд мэргэжлийн хүмүүст хандах нь
таныг болоод танай гэр бүлийг учирч болох олон бэрхшээл, хүндрэлүүдээс
хамгаалах болно.

Танай гэр бүлд эрүүл энхийг хүсье!

Дэлгэрэнгүй мэдээллийг "Монос" эмийн сангийн ХЭРЭГЛЭГЧИЙН СОНИН-гоос