Зарим аймгийн нийт иргэдийн 60 хувь нь группын тэтгэмж авдаг уу

Монголд халамж, тэтгэмж хоёр хавт­гайрлаа гэдгийг дээр дооргүй ярьдаг. Үүнийгээ төрийн хайр, халамж гэж тайлбарлах нь бий. Төрийн халамж үнэхээр зорилтот бүлэгтээ хүрч байна уу гэдэг нь өөрөө маш ноцтой асуудал болж эхэлснийг УИХ-ын чуулганы пүрэв гарагийн нэгдсэн хуралдаанаар Эрүүл мэндийн сайд Т.Мөнхсайханыг Эрүүл мэндийн даатгалын үндэсний зөвлөлийн даргаар томилох асуудлыг хэлэлцэх үеэр УИХ-ын гишүүн Б.Энхбаяр хөндсөн юм.

Тэрбээр “Эрүүл мэндийн даатгалаас олгогдож байгаа групп, тэтгэмжийн асуудал дээр тусгайлсан хөндлөнгийн шалгалт оруулаарай. Монгол Улсын нийт хүн амын хэд нь өвчтэй гэж групп авч байна вэ. Энэ нь яг үнэн байна уу гэдгийг мэргэжлийн баг гаргаж газар дээр нь шалгаж дүгнэлт гарах шаардлагатай. Манай нэг аймгийн нэг сумын иргэдийн тал хувь нь хөгжлийн бэрхшээлтэй иргэний групп авч байгаа гэсэн мэдээлэл байна. Энэ худлаа. Бүхэл бүтэн нэг сумын тал хувь нь хөгжлийн бэрхшээлтэй болсон байна гэж байхгүй. Хэрэв тийм бол үндэсний хэмжээнд эмгэнэлтэй зүйл болсон байх ёстой. Гэтэл яагаад тэдэнд хөгжлийн бэрхшээлтэй иргэний тэтгэмж олгоод байгаа юм. Үүнээс үзэхэд энд тэнд үгсэн хуйвалдаж худал дүгнэлт гарган Эрүүл мэндийн даатгалын сангийн хөрөнгийг авч байгаа авлига байна гэсэн үг. Энэ нь сангийн үр ашиггүй байдалд нөлөөлж байна. Сайд ямар байр суурьтай байна вэ” хэмээн асуухад Эрүүл мэндийн сайд Т.Мөнхсайхан “Группыг манай эмч нар тогтоодог. Мөнгө нь нийгмийн халамжаас олгогддог. Бид аймгууд дээр судалгаа хийж үзсэн. Зарим аймгийн хүн амын  60 хувь нь группт орж, халамжийн мөнгө авдаг хавтгайрсан байдал байгаа” гэдгийг хэллээ.

Өнөөдрийг хүртэл нэг аймгийн иргэдийн 60 хувь нь группын мөнгө авч амжиргаагаа залгуулж ирснийг хэлж байсангүй. Тэгвэл Эрүүл мэндийн сайд Т.Мөнхсайханы хэлсэн дээрх аймаг нь Баян-Өлгий болж таарав. Учир нь саяхан Баян-Өлгий аймгийн эмч нар болон нийгмийн даатгалынхантай холбоотой асуудал сөхөгдсөн. Иргэдийн зүгээс эмч нарыг авлига нэхдэг болохыг хуулийн байгууллагад мэдээлснээр тэр бүх зүйл сөхөгдөн Баян-Өлгий аймгийн 40 гаруй эмчийн эрх мэдэл, албан тушаалын байдлаа урвуулан ашиглан бусдаас авлига авч, хуурамч онош тогтоосон гэх үндэслэлээр шалгаж байгаа гэх мэдээлэл гараад байгаа юм.