Нэр дэвшигч Э.Батхүлэгийн ард ТЭД БИЙ

УИХ-ын Хууль зүйн байнгын хорооны гишүүд Улсын Дээд шүүхийн шүүгчид нэр дэвшигч Э.Батхүлэгт хоёр дахь удаагаа "үгүй" гэж хэллээ. Учир нь, тэд түүнийг Улсын Дээд шүүхийн шүүгчээр ажиллахад улс төрийн болон ёс зүйн шаардлагыг хангахгүй гэж үзсэн юм. Өөрөөр хэлбэл, нэр дэвшигч Э.Батхүлэг нь "Голомт" банкны хуульчаар ажилласан гэх л туршлага, намтартай ч хоёр дахь удаагаа парламентын босго давахаар орж ирсэн явдал нь зарим гишүүний эгдүүцэл, хардлагыг төрүүлээд байна. Тиймдээ ч УИХ-ын Хууль зүйн байнгын хорооны гишүүд нэр дэвшигч Э.Батхүлэгийг Улсын Дээд шүүхийн шүүгчээр томилох нь хэнд ашигтай, түүний ард хэн байгааг бараг л хэлээд өглөө.

Тухайлбал, байнгын хорооны зарим гишүүн нэр дэвшигч Э.Батхүлэгтэй холбоотой байгууллагын болон түүний өмгөөлж байсан, байгаа олон төсөл, хөтөлбөр шүүхийн өмнөх шатанд яваа нь ашиг сонирхлын том зөрчил гэж тайлбарлаж байна.

Энэ талаар УИХ-ын гишүүн Ж.Сүхбаатар "Хуулийн болон ёс зүйн шаардлага хангахгүй байна. Ичихгүй, улайхгүй орж ирээд байх юм. Биеэ даасан байр суурьтай хүн биш байна. Нэг аж ахуйн нэгжийг ялгаж байгаа юм биш. Танай байгууллагатай холбоотой олон төсөл хөтөлбөр шүүхэд орж ирнэ. Та өөрөө 40-өөд хэрэг дээр нь өмгөөлөгчөөр оролцсон байна. Дахиад ч таны өмнө нь ажиллаж байсан байгууллагын асуудал орж ирнэ. Энэ нь сонирхлын зөрчил үүсгэнэ" гэж ярьсан байдаг. 

Түүнчлэн Улсын Дээд шүүхийн шүүгчид нэр дэвшигч Э.Батхүлэгийн эзэмшлийн “Өсөх зоос” компани нь Өмнөговь аймгийн Гурвантэс сумын Нарийнсухайтын бүлэг ордын Хүрэншандын уурхайг эзэмшдэг. Тус компанийн тодорхой хувийг улс төрд нөлөө бүхий хүний эзэмшлийнх гэдгийг зарим хэвлэл хөнджээ.

Цаашлаад шинэ төмөр замын бүтээн байгуулалтын ажилтай холбоотой олон төсөл, хөтөлбөрийн "но"-той асуудал шүүхийн хаалга татах нь зөвхөн цаг хугацааны л асуудал болсон байхыг үгүйсгэхгүй. Энэ мэт олон асуудал, эрх ашгаас үүдэж Э.Батхүлэгийг Улсын Дээд шүүхийн шүүгчээр томилох сонирхол хэсэг нөхөрт бий гэдэг нь тодорхой харагдаж байгаа юм. Өөрөөр хэлбэл, Э.Батхүлэгийг Улсын Дээд шүүхэд аваачих нь анхнаасаа "Тохироотой томилгоо" гэж хэлж болно. 

-НЭР ДЭВШИГЧ Э.БАТХҮЛЭГ ГЭЖ ХЭН БЭ?- 

Тэрбээр 1978 онд Ховд аймагт төрсөн, 42 настай, эхнэр, гурван хүүхдийн хамт амьдардаг. 1986-1996 онд Сэлэнгэ аймгийн 10 жилийн дунд сургууль, 1997-2002 онд ОХУ-ын Кубанийн Их сургуулийг төгссөн. Эрх зүйч мэргэжилтэй. 2012-2013 онд Австрали улсын Квисландийн төв их сургуульд менежментээр мастер, 2005 онд ОХУ-ын Краснодар хотын Их сургуульд Хууль зүйн ухааны доктор цол тус тус хамгаалсан. 2002-2005 онд "Мандваа" ХХК төслийн менежер, 2006.01-2006.03 сард Улс төрийн боловсролын академид судлаач багш, 2006-2011 сард "Голомт банк" ХХК-ийн Хуулийн хэлтэст хуульч, Хуулийн хэлтсийн захирал, 2013-2015 сард "Голомт банк"-ны Удирдлагын ажлын албаны зөвлөхөөр, 2015 сараас одоог хүртэл "Өмгөөллийн санхүүгийн хуулийн Зөвлөх" хувь нийлүүлсэн нийгэмлэгт хуульч, Гүйцэтгэх захирлаар ажиллаж байна.

Дахин сануулахад, УИХ-ын Хууль зүйн байнгын хорооны өчигдрийн /2020.11.03/ хуралдаанаар Улсын Дээд шүүхийн шүүгчид нэр дэвшигч Э.Батхүлэгийн танилцуулгыг сонсохоос татгалзаж, хоёр дахь удаагаа "үгүй" гэж хэлсэн.

Тэгвэл ирэх долоо хоногийн УИХ-ын Хууль зүйн байнгын хорооны хурлаар нэр дэвшигч Э.Батхүлэгийн нэрийг дахин оруулж ирсэн тохиолдолд яах вэ гэдэг асуултад УИХ-ын гишүүн Б.Энхбаяр "Үндсэн хуульд зааснаар Улсын Дээд шүүхийн шүүгчийг УИХ-д танилцуулснаар томилдог. Ерөнхийлөгч УИХ-д танилцуулахгүйгээр томилох эрхгүй. Хэрэв ийм зүйл болох юм бол Ерөнхийлөгч өөрөө Үндсэн хуулийн Цэц дээр очно. Тэгэхээр Шүүхийн ерөнхий зөвлөл Ерөнхийлөгчийг тийм байдалд оруулахгүй байх. Ерөнхийлөгч ч гэсэн Үндсэн хуулиа зөрчихгүй байх гэж найдаж байна. Нэр дэвшигчтэй УИХ л танилцана гэдэг нь тухайн гишүүд нүүрийг нь харах гээд байгаа асуудал биш. Янз бүрийн ашиг сонирхолтой хүн эсэхийг нь ард түмэнд танилцуулах гэж байгаа ойлголт юм" гэсэн тайлбарыг өгөөд байна.