Б.Энх-Амгалан: Захиалгатай, эзэнтэй хонгилынхон амь бөхтэй оршиж байна

УИХ-ын гишүүн Б.Энх-Амгалан нар өнөөдөр /2021.03.16/ Төрийн ордонд мэдээлэл хийлээ. 

Энэ үеэр УИХ-ын гишүүн Б.Энх-Амгалан "УИХ-ын хаврын чуулган өчигдөр нээлтээ хийлээ. Энэ чуулганаар УИХ-ын дарга хоёр Ажлын хэсэг томилсон. Нэг Ажлын хэсгийг нь Ц.Мөнхцэцэг гишүүн ахалж байна. Нөгөөг нь миний бие ахалж байна. Нийгэмд асуудал болж, хэвлэл мэдээллээр байнга гарч эргэлзээ төрүүлээд байгаа зүйлтэй холбоотойгоор мэдээлэл хийж байна. Үндэсний аюулгүй байдлалын зөвлөлийн талаар мэдээлэл их гарч байна. Энэ зөвлөлийн Ажлын албаны дарга төрийн тусгай албан тушаалын ангилалд хамаардаг. Хэвлэлээр ил болсон Үндэсний аюулгүй байдлын зөвлөлийн нэр бүхий албан хаагчид улсын хилээр нэвтрэхдээ их хэмжээний мөнгө авчирсан гэдэг асуудал байна. Үүнийг ил тод болгох ёстой. Үнэхээр хилээр тэр их хэмжээний мөнгө орж ирсэн үү. Улсын хилээр ямар бараа материалтай орж ирэв. Тэр юунд зарагдсан, ямар зориулалттай байсан бэ гэдгийг хуулийнхан шалгах ёстой" гэлээ. 

Түүнчлэн "Б.Баасанцогт гэдэг өмгөөлөгчтэй холбоотой асуудал гарч ирлээ. Шүүгч нартай дотно харилцаа үүсгэдэг, хэрэг төлөвлөдөг гэх мэдээлэл гарч байна. Хэрэв ийм байх юм бол шударга шүүхийн тухай ярих нь утгагүй. Үүнийг хууль хяналтын байгууллага хараа хяналтадаа авч шалгах ёстой. Шүүхийн тухай хуулийг шударга шүүхтэй болох гэж хийсэн. Хонгилын системийн нураах гэж хийсэн шүү. Захиалгатай, эзэнтэй хонгилынхон амь бөхтэй оршиж байна гэх мэдээлэл байна. Ардчилсан нийгэмд хүнийг хэлмэгдүүлж, эрүүдэн шүүх ёсгүй. Ийм олон мэдээлэл гараад байхад энэ бүхэн дээр хуулийнхан хэрэг үүсгэхгүй, шалгахгүй, чимээгүй байна вэ. Тиймээс цагдаа, тагнуул, АТГ-т бичиг хүргүүлнэ. Энэ асуудлыг шалгаж, мухарла. Үнэн зөвийг ард түмэнд ялгаж ойлгуул гэдэг асуудлыг хөндөж байна" хэмээн тодотголоо.