Талийгаачийн ар гэр: Ж.Одгэрэл гэх бүсгүйтэй бид огт уулзаж байгаагүй

Нийслэлийн Онцгой байдлын газрын харьяа Гал унтраах ангийн алба хаагч тогонд цохиулж амиа алдсан харамсалтай хэрэг энэ сарын гурванд гарсан. Үүнтэй холбоотойгоор түүний эхнэр Ж.Одгэрэл  өлсгөлөн зарлаж байгаагаа мэдэгдсэн билээ.

Тэрбээр “2021 оны арван хоёрдугаар сарын 3-ны 09:27 минутад миний нөхөр Улиастайн уулзвар дээр байдаг Монголын цагдаагийн 100 жил гэсэн самбарын хулдаасыг буулгах гэж байгаад тогонд цохиулж амиа алдсан. Мэргэжлийн бус жолоочийн алдаанаас үүдэн тогонд цохиулсан. Тиймээс осол болсон үеийн камерын бичлэгийг  олон нийтэд ил болгох хүртэл өлсгөлөн зарлана" гэсэн юм. Тэгвэл амиа алдсан алба хаагчийн ар гэрийнхэн өнөөдөр /2021.12.15/ тайлбар мэдээлэл хийлээ.  

"ДҮҮГЭЭ ӨӨД БОЛСНЫ ДАРАА Л Ж.ОДГЭРЭЛ ГЭХ БҮСГҮЙГ АНХ ХАРСАН"

Талийгаачийн ах Э.Мөнх-Эрдэнэ " Биднийг дайрч давшилсан, доромжилсон байдал сошиалаар хүчээ авч байна. Миний ээж, аав ах дүү нар төрөл төрөгсөд маань хүнээ алдсан хүмүүс дээрээс нь сэтгэл санааны гүн хохирол амсаж байна. Ж.Одгэрэл гэдэг энэ эмэгтэй өмнө нь бидэнтэй огт уулзаж байгаагүй. Арванхоёрдугаар сарын 3-нд дүүгээ өөд болсныг мэдээд бид нар очсон. Яг тэр үед энэ охиныг харсан. Өөд болсон өдрийнх нь орой цогцос таниулах явцад өөрийг нь утасдаж дуудсан юм. Талийгаач дүү маань найз охинтой гэж л  мэдэж байсан. Би нагац ахтайгаа хамт тэр бүсгүйг дагуулаад гурвуулаа орсон.

Хуулийн байгууллагаас талийгаачийн ээж аавыг оруулахгүй байхыг хүссэн. Бид гурав ороод дүүгээ харчихаад тойроод л гарсан. Гэтэл энэ эмэгтэй цогцсын бүтээлгийг авч, бүтэн биеэр нь харсан мэтээр ярьж, сошиалд цацаж байна.

Гол нь ээж, аав ах дүү нараасаа бид тэр үйл явцыг нуусан байсан. Гэтэл энэ эмэгтэй дүүгийн маань цогцсыг хуйхалсан толгой шиг гэх мэт аймшигтайгаар ярьсан. Түүнээс нь болоод миний эцэг эх хүүгээ ямар байдалтай үхсэн шалтгааныг нь мэдэхгүй байсан хүмүүс гүн шоконд ороод байна. Энэ охин яагаад ийм асуудал тариад яваад байгааг манай ар гэрийнхэн ойлгохгүй банйа. Дүүг маань өөд болсны маргааш буюу 4-ний өглөөнөөс эхлээд л сошиалаар элдэв мэдээлэл цацаж, бидэн рүү дайрч, давшилсан.

Гуравны орой шүүхийн шинжилгээнээс гараад энэ охинтой уулзаад “Миний дүү манай гэр бүлийнхэнтэй уулз” гээд гэрийнхээ хаягийг өгөөд гэртээ аваачсан.Түүнээс хойш биднийг буруутгасан хэлбэрээр сошиалаар сэвсэн. Хувийн чатаар хүртэл дарамталсан. Бүх нотлох баримт нь байгаа. Үүний дагуу өөрийн зүгээс цагдаад өгч шалгуулах болно" гэлээ.

"Ж.ОДГЭРЭЛ ТАЛИЙГААЧ АХЫН МИНЬ ЗУРАГНЫ ХАЖУУД БАЙСАН ОДОН МЕДАЛИЙГ АВААД ЗУГТСАН"
 

Талийгаачийн дүү Э.Нандинчимэг "Ж.Одгэрэл гэх бүсгүйг бид ахыгаа өөд болдог өдөр буюу арванхоёрдугаар сарын 3-ны өдөр л харсан. Өмнө нь огт харж байгаагүй, танихгүй.

Ах минь найз охинтой болсон гэж хоёр сарын өмнө утсаар ярихдаа хэлж байсан. Гэтэл энэ бүсгүй гэрт минь ирээд ээж аав хоёрт минь эмгэнэл илэрхийлж, түшиг болох байх гэж маш их бодсон боловч тэгсэнгүй. Дан бидний эсрэг үйлдэл хийж байгаа нь бидэнд маш хүнд цохилт болж, ээж аав хоёрт маань маш хэцүү байна.

Төрсөн дүү нь зодсон, одон медалийг нь шидсэн, хэрэггүй төмөр хог новшоо аваад яв гэсэн гэх ярианд нь би залруулга хиймээр байна. Манай удамд хэзээ ч тийм зүйл байхгүй. Ялангуяа буяны ажилтай байх үед бидний сэтгээс хэзээ ч тийм үйлдэл гарахгүй.

Тэр Ж.Одгэрэл бүсгүй манайд орж ирээд буянд нь өгсөн мөнгөө буцааж авъя гэхэд нь миний ээж өгсөн. Мөнгөө авчихаад шууд ахын минь хөрөг рүү дайрахад нь ээж минь "Одоо би чамайг ийшээ явуулмааргүй байна" гэсэн.

Эхлээд зул барих гэж байгаа юм болов уу гээд гарыг нь харсан. Гэтэл ээжийг минь түлхээд талийгаач ахын минь зурагны хажууд байсан одон медалийг аваад зугтсан. Аав минь ухаан алдаж унах шахсан.

“Би хүүгийнхээ юмыг авъя, бахархая” гээд аав минь уйлж үлдсэн. Гэтэл тэр эмэгтэй "Дүү нь зодсон, одон медалийг нь шидсэн" гэж хэлсэн. Бидэнд хүн зодох хүмүүжил байхгүй.

Ахынхаа одон медалиар бид бахархаад суух хэрэгтэй байтал дээрэмчин шиг орж ирж авчихаад олон нийтэд ташаа мэдээлэл тараасанд үнэхээр харамсаж байна. Хууль хяналтын байгууллагынхан албан ёсоор мэдээлж өгөхийг хүсэж байна. Энэ хэргийг үнэн зөвөөр шийдэж, бидний сэтгэлийг дэвтээж өгөөсэй гэж хүсье" гэсэн юм.

"Ж.ОДГЭРЭЛ ГЭХ БҮСГҮЙ ХОЁР ЖИЛИЙН ӨМНӨӨС СОШИАЛААР СЕНСАЦ ҮҮСГЭЖ БАЙСАН ЮМ БИЛЭЭ"

Талийгаачийн нагац ах “Ж.Одгэрэл гэх эмэгтэйг талийгаач дүүгийн минь хайрлаж байсан хүн гэж бодож, нээлттэй харилцаатай байхыг хүссэн. Гэтэл тэр хүн бүр эсрэгээрээ яваад байна. Тэр бүсгүйг судлахад, хоёр жилийн өмнөөс сошиалаар сенсац үүсгэж байсан хүн байна лээ.

Бид энэ асуудлыг осол гарснаас нь эхлээд хуулийн байгууллагаар шалгуулж байгаа. Талийгаачийнхаа араас буян үйлдээд байж байх ёстой. Гэвч 10 гаруй хоног бидэн рүү дайрч давшилж байгаа учраас аргагүйн эрхэнд мэдээлэл хийж байна” хэмээв.