Ч.Гантуул: Гадаад орчинд амны хаалт зүүх ШААРДЛАГАГҮЙ

Америк, Франц гэх мэтчилэн дэлхийн ихэнх улс орнууд маскийг заавал зүүх шаардлагагүй хэмээн зарлаж, тухайн хүний хувийн асуудал гэх ийм мэдэгдлийг гаргаж байна. 2022 он гарснаас хойш Монгол Улсад ч ковид-19 халдварын илрэх тохиолдол цөөрч байна. Тухайлбал сүүлийн 24 цагт гэхэд улсын хэмжээнд халдварын 34 шинэ тохиолдол бүртгэгджээ.

Халдварын тархалт ийн багассанаас үүдэн олон нийтийн газраар үйлчлүүлж буй иргэд амны хаалтаа зүүхгүй байх тохиолдол олширч байна. Тэгвэл цар тахлын нөлөө багасаж байгаа энэ үед амны хаалтыг зүүх зайлшгүй шаардлагатай эсэх талаар ХӨСҮТ-ийн амбулаторийн их эмч, клиникийн профессор Ч.Гантуулаас тодрууллаа.

-Дэлхийн ихэнх улс орнууд амны хаалт зүүх шаардлагагүй гэх мэдэгдэл гаргаж байна. Манай улсад халдварын тохиолдол ч багассан. Үүнээс үүдэн олон нийтийн газраар үйлчлүүлж байгаа иргэд амны хаалт зүүхгүй байгаа ажиглагдаж байна. Амны хаалтаа тайлах нь зөв үү? 

-Дэлхий дахинд ковид-19 цар тахлын халдвар багасаж байна. Манай улсад ч мөн адил өдөр тутмын мэдээгээр ковид19 халдварын тохиолдол харьцангуй буурч байгаа. Гэхдээ маскны хэрэглээтэй холбоотойгоор маргаантай асуудал бий. Дэлхийн ихэнх улс оронд маскыг битүү орчинд зүүгээд гадаад орчинд зүүхгүй байна.

Тэгэхээр бид ч мөн адил гадаад орчинд маскаа тайлаад, хүн хоорондын зайгаа барих хэрэгтэй. Харин дэлгүүр орох, лифтэнд суух гэх мэт олон хүнтэй дотоод орчинд бол зүүх нь зөв.

ВИДЕО ХЭЛБЭРЭЭР ҮЗЭХ: 

-Таны хэлж байгаачлан амны хаалтыг гадаад орчинд зүүх шаардлагагүй гэж албан ёсны мэдэгдэл гаргах болов уу, дэлхийн улс орнууд мэдэгдэл гаргаж байна? 

-Одоогийн байдлаар Эрүүл мэндийн яамнаас ямар нэгэн зөвлөгөө, зөвлөмж өгөөгүй байна. Дэлхийн эрүүл мэндийн байгууллагаас ч гэсэн одоо маск зүүх эсэх талаар тодорхой мэдэгдэл гаргаагүй байгаа. Тэгэхээр ямар нөхцөлд маск зүүхээ хувь хүн өөрсдөө л мэдэж зүүх хэрэгтэй.

-Бид хоёр жил гаруй хугацаанд маск зүүсэн. Амны хаалтыг зүүснээс үүдэж гарах хор уршиг бий юу?

-Амны хаалтыг удаан хугацаанд зүүх нь амьсгалын эрхтэн тогтолцоонд сөрөг нөлөөтэй. Маск зүүснээр агааржуулалт бүрэн явагдахгүй.

Мөн одоо маскаа ариутгаж зүүж байгаа хүн ховор болсон байна. Амны хаалтаа хоёр цаг тутамд солих, хэрэв удаан хугацаагаар зүүх бол зориулалтын бүтээгдэхүүнээр ариутгах хэрэгтэй. Гэтэл одоо тогтмол сольж, ариутгахгүй байгаа. Тэгэхээр янз бүрийн бактерийн халдвар авах эрсдэл өндөртэй.

Тийм учраас халдварын тархалт багассан энэ үед хүн цөөтэй газраар маскаа авах нь зүйтэй.