Боловсролын бичиг баримт гээсэн бол дахин авахад юу шаардлагатай вэ?

Бүрэн дунд боловсролын үнэмлэх нөхөн авахад:

1.Сургуулиас Б маягт авах

1997 оноос өмнө 10 дугаар анги төгсөгчид сургуулиас журналын арын дүнтэй хэсгийг хичээл тус бүрээр канондуулж, сургуулийн захирлын тухайн сургуулийг төгссөнийг батлах тодорхойлолт авах. Жич: 1999-2000 онд 8,10 дугаар анги төгсөгчид сургууль дээрээ Б маягтаа шүүлгээд байхгүй тохиолдолд МХЕГ, БСШУЯ-нд хандаарай. Мөн анх олгосон баримт бичгийн хуулбар байхгүй тохиолдолд сургууль төгсөгчдийн цомог зураг /монтаж/ байж болно.

2.Сургууль дээр Б маягт байхгүй тохиолдолд

1998-2006 онд 10 дугаар анги төгсөгчид БСШУЯ-ны архиваас дүнгээ шүүлгэх, 2007 оноос хойш 10, 11 дүгээр анги төгсөгчид Нийслэлийн боловсролын газраас Б маягт авах боломжтой.

Суурь боловсролын гэрчилгээ нөхөн авахад:

1.Суурь боловсролын гэрчилгээ гээгдүүлсэн 8 дугаар ангийн төгсөгчид сургуулиас Б маягт авах, байхгүй тохиолдолд журналын арын дүнтэй хэсгийг хичээл тус бүрээр канондуулж, сургуулийн захирлын гарын үсэг, тамгатай тодорхойлолт авч ирэх

Бүрдүүлэх материал:

НБГ-т хандаж суурь боловсролын гэрчилгээ, бүрэн дунд боловсролын үнэмлэх нөхөн олгохыг хүссэн өргөдөл бичих, иргэний үнэмлэхийн хуулбар, гээгдүүлсэн боловсролын үнэмлэх гэрчилгээг он, дугаар, овог нэр, сургуулийн хаягийг тодорхой бичиж, сонингоор хүчингүй болгож зарлуулсан баримт бичиг, сургууль төгссөн цомог зураг /монтаж/-ийн хуулбарыг эх монтажтай хамт, сурагчийн хувийн хэргийн нүүр, хувийн хэрэг анх нээсэн, сурлагын үнэлгээ, дүн, сургууль төгссөн тухай тэмдэглэлийн хуулбараа авч ирэх болон Боловсролын үнэмлэх, гэрчилгээний үнэ-4500 төгрөгийг НБГ-т тушаана.

Овог нэр, регистр солигдвол нэмж бүрдүүлэх материал:

Иргэний бүртгэл мэдээллийн төвийн тухайн иргэний овог, нэр, регистр сольсон баримт, хүчингүйд тооцсон гэрчилгээ, үнэмлэх дахин авахад нэмж бүрдүүлэх материал, хүчингүйд тооцсон холбогдох газрын баримт, МХЕГ-ын Боловсролын хяналтын улсын байцаагчийн шийтгэврийн хувийг бүрдүүлэх бөгөөд материалыг өдөр бүр Нийслэлийн боловсролын газарт хүлээж авч, ажлын гурван өдөрт олгодог юм.

Гадаадад сурапцагчдын тоцорхойлолтыг хэрхэн гаргах вэ?

Гадаадад суралцаж боловсрол эзэмшсэн иргэний гэрчилгээ, үнэмлэх дүйцүүлэн тодорхойлолт гаргахад:

1.Гадаад улс орнуудад суурь, бүрэн дунд боловсрол эзэмшигч Монгол Улсын иргэний боловсролын баримт бичгийг дүйцүүлэн тодорхойлолт олгоно.

2.Боловсролын баримт бичгийг Монгол Улсад мөрдөгдөж байгаа боловсролын стандарт, сургалтын төлөвлөгөөнд тусгагдсан хичээлүүдийн агуулгын хүрээнд дүйцүүлэн тодорхойлж өгнө.

З.Боловсролын баримт бичиг дүйцүүлэх тодорхойлолтыг Боловсролын асуудал эрхэлсэн төрийн захиргааны төв байгууллагын тухайн асуудал хариуцсан албан тушаалтан хариуцан гүйцэтгэнэ.

4.Монгол Улсын иргэний гадаад улс оронд төгссөн баримт бичгийн орчуулгын товчоогоор орчуулсан албан ёсны орчуулга, нотариатаар батлуулсан хуулбарыг суралцагчийн хувийн хэрэг, түүнтэй адилтгах баримт бичигт хавсаргана.   

Монгол Улсын иргэн нь гадаад улс орнуудын ЕБС-д суралцаж, сургуулиа төгсөлгүйгээр Монгол Улсын ЕБС-д шилжин суралцах тохиолдолд:

Боловсролын асуудал эрхэлсэн төрийн захиргааны төв байгууллагад хүсэлтээ гаргаж, дараах материалыг бүрдүүлнэ. Үүнд, гадаад улс оронд боловсрол эзэмшсэнийг нотлох боловсролын баримт бичгийн эх болон орчуулгын товчоогоор орчуулсан албан ёсны орчуулга, нотариатаар батлуулсан хувилбар хувь болон тухайн ангид судлах хичээлийн агуулгаар мэдлэг, чадварын түвшин тогтоох шалгалт авч, харгалзах түвшний ангид суралцуулдаг юм.

Эх сурвалж: МОНЦАМЭ