Ц.Даваасүрэн: "Ичсэн хүн хүн ална" гэгч боллоо, Б.Жавхланг огцруулах хэрэгтэй

УИХ-ын гишүүн Ц.Даваасүрэн Сангийн сайд Б.Жавхланг огцруулах шаардлагыг хүргүүллээ. /2022.11.04/

Тэрбээр "Миний бие үндсэн хуулийн 39.4 дэх заалтын дагуу Монгол Улсын Ерөнхий сайдад Сангийн сайд Б.Жавхланг огцруулах шаардлагыг хүргүүлж байна. Ингэхдээ дараах таван үндэслэлийг тавьсан. 

1. Өчигдөр Сангийн сайд Б.Жавхлан чуулганы хуралдаанд миний зүгээс огт хандаж байгаагүй "105 сая еврогийн баталгааг Дарханы арьс ширний цогцолборт гаргаж өг гэсэн. Төслийн нийт өртгийг 160 сая евро болгож өсгөсөн" гэсэн огт үндэслэлгүй худал, гүтгэлгийг цацсан. Энэ талаар ХХААХҮЯ-аас тодруулахад төслийн нийт өртөг нь урьдчилсан байдлаар 90 сая ам доллар юм байна. Харин баталгаа гаргах эсэх асуудал одоогоор яригдсан зүйл байхгүй гэсэн. Ер нь бол ичсэн хүн хүн ална гэгчээр надтай огт ярьж байгаагүй зүйлээ ярьсан мэтээр худлаа гүтгэсэн. 

2. Би Б.Жавхланг ойрын хамааралтай хүмүүсээ хаана, хаана ямар албан тушаалд томилсонг өмнө нь хэлсэн. 2017 онд УИХ-ын нэр бүхий 11 гишүүний хамт Хөгжлийн банкны хууль нэмэлт өөрчлөлт өөрөө санаачилж оруулсан. Ингээд банкны удирдлагууд 5 тэрбум төгрөгийг олгох эрхтэй болсон. Үүнээс хойш жижиг жижиг зээлүүд цуварч, Хөгжлийн банкийг дампууруулах гол хүчин зүйл болсон.

Мөн түүний хамаарал бүхий этгээдүүд Чингис хаан банканд  49 тэрбум төгрөгийг хадгаламжийг байршуулаад байхгүй болгосон. Гэтэл энэ мөнгийг авахгүй, найдваргүй болсон цагт нь Сангийн сайд төрийн баталгаа гаргаж, гадаад зээлийг төлнө гэж асуудал оруулж ирсэнийг би боль гэж хэлсэн. Гэтэл урдаас хаа, хамаагүй арьс ширний үйлдвэр яриад байна. Энэ огт худлаа.

3. Б.Жавхлан хаана, ямар банк, зээлийн сан байна түүнд гар хүрч байна гэж би хэлсэн. Монголбанкны дэргэдэх "Бичил санхүүгийн хөгжлийн зээлийн сан"-д өөрийн дүү Б.Амгаланг ажилд оруулсан. Нийтдээ 2.8 тэрбум төгрөгийн зээлийг "Зэт финанс" ББСБ-аар авсан. Мөнгө угаасан гэсэн үг. 

4. Б.Жавхлан 2014 онд Капитал банкнаас иргэн н.Чинзоригийн нэр дээр 1.2 тэрбум төгрөгийн зээл, эхнэр н.Соёлмаагийн нэр дээр барьцааны гэрээг байгуулж, авахуулаад төлөөгүй. Улмаар энэ зээл Төрийн банканд шилжсэн гэх мэдээлэл байгаа. Төрийн банк чинь Сангийн сайдын харьяанд байгаа.

5. Сангийн сайдын багцад арилжааны банкууд ААН-үүдэд зээл олговол хүүгийн зөрүү олгоход 60 тэрбум төгрөгийг суулгаж өгсөн байгаа. Банк, зээлийн сангуудын хямд хүүтэй зээлээр мэргэшсэн Сангийн сайд үүнийг шударгаар олгож байгаа гэдэгт эргэлзэж байна.

Иймд Сангийн сайд Б.Жавхланг нэн даруй огцруулж, АТГ-д шалгуулах арга хэмжээ авах шаардлагыг хүргүүлж байна" гэлээ.