О.Цогтгэрэл: Улсын эрх ашиг нэрийн дор иргэдийн газрыг чөлөөлөх гэж байна

УИХ-ын чуулганы өнөөдрийн /2022.12.01/ хуралдаанаар Газрын ерөнхий хуульд нэмэлт өөрчлөлт оруулах тухайн хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцлээ. Хэлэлцэж буй асуудалтай холбогдуулан УИХ дахь АН-ын бүлгийн дарга О.Цогтгэрэл үг хэллээ.

Тэрээр "Газрын багц хуулиуд өнгөрсөн баасан гарагт тэр тусмаа Газрын ерөнхий хууль болоод Газар чөлөөлөлтийн хууль дээр АН-ын бүлгээс завсарлага авсан.

Үүнд үзэл баримтлалын шинжтэй хэд хэдэн зүйлүүд байгаа.

Газрын хуулийн үндсэн үзэл баримтлал нь бүгдийг төвлөрүүлсэн, босоо болгосон, орон нутгийн эрх мэдлийг Улаанбаатарт төвлөрүүлсэн үзэл санааны шинжтэй олон зүйлүүд байгаа юм.

Энэ чинь бидний орон нутгийн өөрөө удирдах ёс гэж өнгөрсөн 30 жилд баримталж ирсэн. Хууль орж ирэх бүрд иймэрхүү заалтууд орж ирсээр байгаад энэ улс чинь Улаанбаатар төвтэй, босоо удирдлагатай төвлөрсөн улс болж хувирч байна.

Энэ асуудалтай холбогдуулаад УИХ-ын хууль, эрх зүйн хэлтэс Үндсэн хууль зөрчсөн эсэх тухайд дүгнэлтийг гаргаач ээ.

Нөгөө асуудал нь Газар чөлөөлөлтийн тухай хууль. Энэ ч гэсэн дахиад хувийн өмчийг хуулиар хамгаална гэсэн эрх зүйн тогтолцоог барьж яваа байтал хуулийн хүрээнд, иргэн санал нэгдээгүй байтал газрыг нь улсын эрх ашиг нэрийн дор хэрхэн чөлөөлж болох вэ гэдэг үзэл санаатай хууль орж ирж байна. Газар чөлөөлөлтийн хуулиа цаашаа хэлэлцээд явна биз. АН-ын бүлгээс УИХ-ын хууль, эрх зүйн хэлтэст хандана. Хэлэлцүүлгийн явцад эхлээд дүгнэлтээ гарга. АН-ын зүгээс Үндсэн хуулийн зөрчил байгаа юм биш биз дээ. Хувийн өмчийг хуулиар хамгаалахгүй болчхож байгаа юм биш биз. Хувийн өмчийг хуулийн хүрээнд дээрэмдэн авч болох тухай зүйл заалт орсон юм биш биз гэдэг байр суурьтай байгаа" гэв.