Ш.Раднаасэд: Авлигатай тэмцэхээр боловсруулсан хуулийг чинь гишүүд засаад байна

УИХ-ын чуулган хуралдаж эхэллээ. Хуралдаан эхлэхийн өмнө УИХ-ын гишүүн Ш.Раднаасэд нэлээд ширүүхэн үг дайв.

Тэрбээр “Бид нар жагсаал тараах гээд хууль хийж байх хооронд хулгайч нар чинь зугтааж байна. Голомт банк 1 км 11 сая ам.доллараар барина гэсэн гэрээгээ устгаад санамж бичиг байгуулсан гэдэг мэдүүлэг өгөөд явж байна. Ийм л байна шүү дээ. Жинхэнэ хулгайч нар чинь нуугдаж үлдэж байна. Энэ хооронд хугацаа өгч байна. Ийм юмны төлөө бид энд суугаад байха уу. УИХ гадаад дотоод бүх асуудлыг авч хэлэлцэх бүрэн эрхтэй. Тавантолгой-Зүүнбаян 1 км төмөр зам 1 сая ам.доллар, Тавантолгой-Гашуунсухайт 1 км төмөр зам 5 сая ам.доллар байхад Богдхан төмөр зам 1 км нь 11 сая ам.доллар. Ийм юмыг та нар хүлээн зөвшөөрч байгаа юм уу. Та нар хулгайгаа тасдаж чадахгүй бол 2024 онд дүнгээ тавиулна шүү.

Гараад нэг нэгээрээ уулзахаар алаад өгнө гэдэг. Одоо тэр үнэнгээ хэл л дээ. Энэ ямар өртөгтэй зам баригдаад байгаа юм бэ. ҮАБЗ дээр төмөр зам бариулах нууц гэрээг ярьсан юм уу үгүй юм уу.

Засгийн газраас авлигатай тэмцэхээр өргөн барьсан Эрүүгийн хуулийг чинь УИХ дээр ажлын хэсэг байгуулаад, засаж байна. Нөгөө сайхан заалтуудыг нь засаад явж байна шүү. УИХ-ын гишүүдийн ХАСХОМ-ийг яагаад АТГ шалгаж болохгүй байгаа юм бэ. Яахаараа Ёс зүйн хороо шалгах ёстой юм. Ёс зүйн хороо гэж одоо байхаа больсон. Хуучин бол байсан. Одоо энэ хороог хариуцдаг хүн ч үгүй болсон. Өнөөдөр бид энэ боломжийг ашиглаж хулгайг дарж авахгүй бол хулгай үргэлжилнэ” гэлээ.