Т.Доржханд: Нээлттэй сонсголоос үр дүн гарсан шүү!

Нүүрсний хулгайн асуудлаарх Хяналтын ерөнхий сонсгол өчигдөр (2022.12.21) болж өнгөрсөн. Сонсгол үр дүнтэй болсон эсэх талаар УИХ-ын гишүүн Т.Доржханд байр сууриа илэрхийллээ.

Тэрбээр “Энэ сонсголыг хийхийн тулд би 16 гишүүнээр гарын үсэг зуруулсан. Үүний дараа оффтэйк гэрээг ил болгохгүйгээр иргэдэд мэдээлэл өгөх боломжгүй байсан. Захирамж гарснаас долоо хоногийн дараа оффтэйк гэрээ ил болсон. Та бүхэн харсан бол АТГ, Ерөнхий прокурор, ЦЕГ-ын дарга ирсэн байсан. Тэднийг зогсоож байгаад УИХ-ын дарга шаардлага тавиагүй, иргэд өөрсдөө тавьсан шүү.

Дараагийн үр дүн бол төр иргэдтэйгээ ойрхон байдаг юм гэдэг ойлголтыг нийтэд өгсөн байх. Өглөөний 09:30 цагаас 23:00 цаг хүртэл хоолгүй байсан ч гомдол байхгүй хоёр талаасаа яриад явсан. Орой жагсаал тарахын өмнө Төрийн ордноос гарсан иргэдийг барих гээд байна гэсэн хардлага байсан. Энэ үеэр би хуулийн дарга нараас амлалтыг нь авч байж тэднийг гаргасан. Өнөөдөр надад хэн нэгнийг барьж хорьсон талаар мэдээлэл ирээгүй байна.

Жагсаалыг хүчээр тараалаа гэх хардлага байна. Энэ талаар би Хууль зүй, дотоод хэргийн сайдтай уулзсан. Зарим иргэдийн эрүүл мэндийн байдал муу байсан тул эмнэлгийн тусламж үзүүлээд, гэрт нь хүргэсэн байна лээ. Амьдрал ядуу байна, нийгэм болохгүй байна, хулгайгаа зогсоо гээд гарч ирсэн иргэдийг цөөхөн залуучуудаас болж харлуулж болохгүй” гэлээ.