Зөвлөлдөх санал асуулгын нэг дэх шат эхэллээ
Улс орны нийгэм, эдийн засгийн тулгамдсан асуудлыг иргэдийн туслалцаатайгаар тодорхойлох, асуудлын эрэмбэ, шийдвэрлэх арга зам, гаргах шийдвэрийн талаар иргэдтэй зөвлөлдөх, үндэсний зөвшилцлийг хангах зорилготой “Зөвлөлдөж шийдье” зөвлөлдөх санал асуулгын нэг дэх шат өнөөдрөөс (2023.01.26) орон даяар эхэлж байна.
Зөвлөлдөх санал асуулгын тухай хуульд заасны дагуу мэдээлэл цуглуулах, санал асуулгын үр дүнг гаргах, тайлагнах ажлыг Үндэсний статистикийн хороо, тус хорооны аймаг, нийслэл, дүүрэг дэх нэгжүүд хариуцан гүйцэтгэж байгаа ба нэгдүгээр шатны мэдээлэл цуглуулалт 2023 оны хоёрдугаар сарын 02-ны өдрийг хүртэл зохион байгуулагдана.
Зөвлөлдөх санал асуулга хоёр шаттай бөгөөд санал асуулгын нэг дэх шатанд иргэдэд зөвлөлдөх санал асуулгын сэдвээр урьдчилсан мэдлэг, мэдээлэл өгөхгүйгээр санал асуулгын хуудсаар саналыг нь авна. Үүнд Монгол Улсын арван найман насанд хүрсэн иргэн оролцох эрхтэй бөгөөд улсын хэмжээнд 1570 иргэнийг нэгдүгээр шатны мэдээлэл цуглуулалтад хамруулах юм байна.
Нэгдүгээр шатны мэдээлэл цуглуулалтад хамгийн сүүлийн удаа буюу 2020 онд явагдсан Улсын Их Хурлын болон аймаг, сум, нийслэл, дүүргийн иргэдийн Төлөөлөгчдийн Хурлын ээлжит сонгуулиар гаргасан сонгогчдын нэрийн жагсаалтаас тохиолдлын зарчмаар сонгож авсан 1570 хүн хамрагдана. Мэргэшсэн 77 мэдээлэл цуглуулагч сонгогдсон хүн бүрээс нүүр тулсан ярилцлагын аргаар мэдээлэл цуглуулна.
Хоёрдугаар шатны (2023.02.13-2023.02.14) мэдээлэл цуглуулалт нь Зөвлөлдөх санал асуулгын тухай хуульд заасны дагуу шийдвэр гаргах эрх бүхий этгээд санал авах ажлыг зөвлөлдөх уулзалт хэлбэрээр зохион байгуулна. Ингэхдээ нэгдүгээр шатанд оролцсон иргэдийн 50-иас доошгүй хувийг тохиолдлын зарчмаар сонгоно гэж Улсын Их Хурлын хэвлэл мэдээлэл, олон нийттэй харилцах хэлтсээс мэдээлэв.
Холбоотой мэдээ
Сэтгэгдэл ( 1 )
Би энэ зөвлөлдөх санал асуулгад оролцох хүсэлтэй байна. Яагаад гэвэл өнөөгийн Монголын иргэдийн амьдрал хүндэрч байгааг харж суухад нүд халширч харамсаад ч барахгүй .Энэ нь янз бүрийн хүчин зүйлээс шалтгаалж байна. Хамгийн гол нь одоогийн УИХ ын гишүүд нь халдашгүй дархан байдлын тухай хуулийн далбаан дор нуугдаж ёс суртахууны хэм хэмжээг зөрчиж хариуцлага хүлээхгүй байгаад л бүх зүйлийн эх үндэс болж байна. Мөн сонгуулийн хууль, тогтолцоонд маш их алдаа байгаад дүгнэлт хийх цаг болсон юм биш үү. Шударга үнэнийг эрхэмлэх тангараг өргөсөн гишүүд нь бүрэн хариуцлагатай байж,ёс зүйтэй байх нь зө