Ц.Даваасүрэн: Сэтгүүлчид хүнийг гүтгэхгүй л бол шоронд орохгүй

УИХ-ын өнөөдрийн /2023.03.17/ чуулганы нэгдсэн хуралдаанаар Олон нийтийн сүлжээнд хүний эрхийг хамгаалах тухай хууль болон дагалдан гарсан Харилцаа холбооны тухай хуульд нэмэлт, өөрчлөлт оруулах тухай, Кибер аюулгүй байдлын тухай хуульд нэмэлт оруулах тухай, Хүний хувийн мэдээлэл хамгаалах тухай хуульд нэмэлт оруулах тухай, Татварын ерөнхий хуульд өөрчлөлт оруулах тухай хуулиудад бүхэлд нь тавьсан Монгол Улсын Ерөнхийлөгчийн хоригийг хэлэлцэж байна.   

Энэ үеэр УИХ-ын гишүүн Ц.Даваасүрэн "Энэ хуульд нийгмийн зүгээс тодорхой шаардлага тавьж байгаа. Нэгнээ харлуулах зорилгоор нийгмийн сүлжээгээр дамжуулан гүтгэлэг явуулж байна. Энэ маш хор уршигтай тул бид анхаарах хэрэгтэй. Гэхдээ тэглээ гээд нийтийн мэдээлэл хүртэх эрхийг хязгаарлаж болохгүй. Бусдыг гүтгэж, доромжлохыг л зогсоох ёстой. Гүтгэхгүй бол шоронд орохгүй шүү дээ. Манай зарим хэвлэл мэдээллийнхэн ярьдаг. Гүтгэхтэй холбоотой заалтыг Эрүүгийн хуулиас ав, шоронд орох гээд байна гэж. Үгүй ээ, гүтгэхгүй л байхгүй юу даа. Тэгвэл юу гээд л чирж аваачаад шоронд хийх юм. Гэтэл хэргээр гүтгэх сонирхол байгаад байгааг л гайхаж байна. Үүнийг л таслан зогсоох хэрэгтэй" гэлээ.