Н.Алтанхуяг: Гурван гишүүний асуудлыг НЭЭЛТТЭЙ ярих хэрэгтэй

УИХ-ын өнөөдрийн /2023.03.30/ ээлжит чуулганы нэгдсэн хуралдаан эхэллээ. 

Хуралдаанаар нэр бүхий гурван гишүүний бүрэн эрхийг түдгэлзүүлэх тухай саналыг Төрийн байгуулалтын байнгын хорооноос хаалттай танилцуулж, шийдвэр гаргана. 

Хуралдааны эхэнд УИХ-ын гишүүн Н.Алтанхуяг "Зовлон үзсэн чавганц гэдэг шиг хоёр санаа хэлье. Бид ард иргэдээс сонгогдсон, тэдний мэдэх эрхийг их боогдуулж байна. Үндсэн хуулиар гэм буруутай нь шүүхээр тогтоогдоогүй байхад хэнийг ч гэмт хэрэгтэн гэж үзэхгүй. Гэтэл УИХ-д зарладаг, хэд хоноод хүмүүсийнх нь нэр нь солигдож орж ирдэг. Ингэснээр хуулийн байгууллагын нэр хүнд уначихлаа гэж харж байна. УИХ-д итгэх иргэдийн итгэл ч уначихлаа.

Хэн нь гэмтэй, хэн нь гэмгүйг хуулийнхан тогтоож чадахаа больчихсон юм биш үү. Та нар үг хэлдэггүй юм уу, хэн чинь гэмтэй, гэмгүйг мэдэх арга алга.

Тиймээс УИХ-д оруулж ирж, олон нийтэд гэмтэн гэж зарлачихаад, хаалгаа хааж байгаад хаалттай хуралддаг зүйлийг болих хэрэгтэй.

Ил тод ярих хэрэгтэй байна. Ядаж шүүхээ нээлттэй болгоод өгөөч дээ.

Г.Занданшатар дарга аа, тогтоол гаргах ёстой байна. УИХ-ын гишүүдтэй холбоотой хэргийг шүүх нээлттэй хэлэлцэж баймаар байна.

Хоёрт, шударга бусын эсрэг тэмцэж байгааг зөв гэж бодож байна. Чухал, хэцүү зүйл. Маш их бэрхшээлийн дундуур явна. Гэхдээ бид УИХ-ын гишүүд шүү дээ. Хавар боллоо, ажил хөдөлмөр эхэлдэг юм даа. Та нар хэдэн хүнээ ярихаас өөр зүйл хийдэггүй юм байна гэж ард иргэд хэлж байна шүү. Алга болж байгаа дундаж давхаргаа яаж дэмжих вэ гэдгээ яримаар байна. Биенес эрхлэгчдээ дэмжих тал дээр ярилцмаар байна" хэмээн байр сууриа илэрхийлэв.