Д.Тогтохсүрэн: Санал хураалтад 66 гишүүн оролцож, нууцаар санал өглөө

УИХ-ын өнөөдрийн /2023.03.30/ чуулганы нэгдсэн хуралдаанаар Т.Аюурсайхан, Н.Наранбаатар, Д.Бат-Эрдэнэ нарын гурван гишүүний бүрэн эрхийг түдгэлзүүлэх эсэх асуудлыг хаалттай хэлэлцэж, шийдвэрлэлээ.

Хуралдаанд оролцсон гишүүдийн олонх нь нүүрсний хулгайн хэрэгт нэр холбогдон яллагдагчаар татагдсан УИХ-ын гишүүн Т.Аюурсайхан, Д.Бат-Эрдэнэ нарыг бүрэн эрхээсээ түдгэлзэж, шалгуулах нь зөв гэж үзлээ.

Харин УИХ-ын гишүүн Н.Наранбаатарын бүрэн эрхийг түдгэлзүүлэх шаардлагагүй гэж үзэв. 

Энэ талаар УИХ дахь МАН-ын бүлгийн дарга Д.Тогтохсүрэн "Санал хураалт нууцаар явагдсан, цаасаар явагдсан. Т.Аюурсайхан, Д.Бат-Эрдэнэ нарын бүрэн эрхийг түдгэлзүүлэх шаардлагатай гэж үзсэн. Н.Наранбаатар гишүүнийг бүрэн эрхийг нь түдгэлзүүлэх шаардлагагүй гэж үзсэн. Нийт 66 гишүүн оролцсон. Гадаадад томилолттой тав, зургаан гишүүн байна билээ. УИХ-ын гишүүд өөрийнхөө итгэл үнэмшлээр л саналаа өгдөг" гэх тайлбарыг өглөө.