Сонгуулийн хуулийн төслийг ирэх 7 хоногт хэлэлцүүлэхээр хойшлууллаа

Сонгуулийн хуулийг УИХ нухацтай авч үзэх, гишүүд төсөлтэй танилцах боломжийг олгох үүднээс ирэх 7 хоногт хэлэлцүүлэхээр хойшлууллаа

УИХ-ын чуулганы өнөөдөр /2023.04.06/-ийн нэгдсэн хуралдаанаар УИХ-ын Сонгуулийн тухай хуульд нэмэлт, өөрчлөлт оруулах тухай хуулийн төслүүдийг ирэх 7 хоногт Төрийн байгуулалтын байнгын хороогоор хэлэлцүүлэхээр хойшлууллаа.

УИХ-ын дарга Г.Занданшатар асуудлыг нухацтай авч үзэх ёстойг анхааруулаад “Хуулийг өглөө нь өргөн бариад, өдөр нь байнгын хороогоор хэлэлцүүлж болохгүй. Мөн гишүүд төсөлтэй танилцах боломж олгох үүднээс хойшлуулж, ирэх долоо хоногийн мягмар гарагт хэлэлцүүлж эхэлнэ” гэв.

УИХ-ын Сонгуулийн тухай хуульд нэмэлт, өөрчлөлт оруулах тухай хуулийн төслүүдийг өчигдөр УИХ-ын даргын захирамжаар байгуулагдсан Ажлын хэсэг болон УИХ дахь АН-ын бүлгээс тус тус өргөн барьсан. Эдгээр төслүүдэд сонгуулийг хосолсон тогтолцоогоор явуулах замаар санал гээгддэг явдлыг арилгах, сонгуулийн зардлыг бууруулах, гадаад улс оронд ажиллаж амьдарч буй иргэдийг сонгуульд оролцуулах зэрэг асуудлууд тусаад байгаа юм.

Мөн УИХ-ын дарга Г.Занданшатар эрх бүхий хууль санаачлагч нарт цаашид нэн яаралтай горимоор хууль хэлэлцүүлэх асуудлыг тавихгүй байхыг дахин анхаарууллаа. УИХ-ын чуулганы дэгийн тухай хуульд Засгийн газраас нэн яаралтай горимоор оруулж ирсэн хуулийн төсөлд олон нийтийн хэлэлцүүлэг явуулах шаардлагагүй, хуулийн шаардлагыг биелүүлсэн эсэхийг ХЗДХ-ийн сайд хянан УИХ-д өргөн мэдүүлж, дараалал харгалзалгүйгээр  хэлэлцэнэ гэх агуулга байдаг. Маргаан дагуулсан Олон нийтийн сүлжээнд хүний эрхийг хамгаалах тухай хууль ч  уг заалтаар явж, хоригтой тулсан.

Тэгвэл УИХ-ын дарга “Хоригоос хойш энэ хуулийн заалтыг хэрэглэхгүй. УИХ-ын гишүүд, Ерөнхийлөгч, хууль санаачлах эрх бүхий этгээдүүд нэн яаралтай горимоор хэлэлцүүлнэ гэсэн асуудал тавихгүй шүү гэдгийг өмнө анхааруулсан. Үүнийг зөв ойлгох хэрэгтэй. Сонгуулийн хуулийг гишүүд уншиж, хариуцлагатай хандах ёстой, нэн яаралтай гээд давхиад байж болохгүй” гэж сануулав.