Торонд хоригдох дургүй ТЭНҮҮЛЧ НЭГЭН ШУВУУХАЙ

“Шувуу” ажиллагаанд хамаарахгүй гээд шургачиж яваа эр нэг ширхэг байна, хөөрхий. Тодорхойгүй хугацаагаар хойшилсон “Нүүрсний сонсгол”-д “Яахав, цахимаар оролцож болох юм” гэсэн утгатай зүйл хэлсэн гэсэн мэдээлэл саяхан гарсан. Тэгэхээр уншигч та “Тавантолгой төмөр зам” ХХК-ийн захирлаар ажиллаж байгаад гадаад руу оргон зайлсан Н.Удаанжаргал байна гэж таасан байх.

Мань эр анх Солонгос улс руу явсан ч цаашаа Америк явсан сураг гарч байв. Саяхан хууль, хүчнийхэн түүнийг Аргентинд байгааг нь тогтоосон ч Тайландад очиж. Гэсэн хэдий тэндээ удалгүй Малайз улс руу машинаар явсныг нь мөн л манайхан олоод мэдчихэж. Энэ мэтчилэн мань “Баатар” торонд хоригдон, “Дууч шувуу” болж дуусахгүйг ихэд хичээж байгаа бололтой.

Монгол төр тэр хүнд итгэл үзүүлж, том төслөө хариуцуулж, бүр сүүлдээ Хөдөлмөрийн баатар цолоор шагнасан ч эцэс сүүлд нь тэрээр эх орондоо өөрийн дураар ирж чадахгүй, тэнүүлчийн амьдралыг сонгож явна. Уг нь харь улсын гар харж, өөрийн улсаас нүүр буруулж явахаар төр, түмнийхээ итгэлийг нэгэн цагт олж явсан шигээ эргэж ирээд, буруу, зөрүүгээ дэнслүүлчих нь хэтийн явдалд нь тустай баймаар. Даанч харамсалтай нь торонд хоригдохыг хүсээгүй нэгэн шувуухай улс улсын тэнгэр дамжин нисэж ч чадахгүй, бууж ч чадахгүй явна.

Т.ХӨВСГӨЛ

Эх сурвалж: ӨГЛӨӨНИЙ СОНИН