Ази тивийн оны шилдэг өсвөрийн рапид шатарчин Д.Мөнхзулыг хүлээн авч уулзав

Монгол Улсын Их Хурлын дарга Г.Занданшатар өнөөдөр (2023.04.26) “Ази тивийн оны шилдэг өсвөрийн рапид шатарчин”-аар шалгарсан дэлхийн хошой аварга, олон улсын шатрын холбооны мастер Д.Мөнхзулыг хүлээн авч уулзаж, баяр хүргэлээ.

Уулзалтын эхэнд УИХ-ын дарга Г.Занданшатар хэлсэн үгэндээ, “Грек Улсад зохион байгуулагдсан Сурагчдын дэлхийн аварга шалгаруулах шатрын тэмцээнээс Монголын баг хоёр алт, гурван мөнгө, нэг хүрэл медаль хүртэж, багаараа гуравдугаар байрт шалгарсан том амжилт гаргалаа. Дэлхийн оюуны их наадамд дэлхийн шилдгүүдтэй өрсөлдөж, оюуны спортоор Монголчууд дэлхийд үнэлэгдэж байгааг нотлон харуулсан баг тамирчдад болон Монголын шатрын холбооны удирдлагуудад баяр хүргэе. Гурван сая хүн амтай Монгол Улсын ирээдүй болсон хүүхэд, залуус оюуны спортод цахиур хагалж, манай улсын баг дэлхийн шилдэг таван багийн нэгээр шалгарсан нь бахархалтай байна” гээд “Ази тивийн оны шилдэг өсвөрийн рапид шатарчин”-аар шалгарсан Д.Мөнхзулд баяр хүргэж, амжилт хүсэв.

Д.Мөнхзул нь 2014 онд Өмнөд Африкийн Бүгд Найрамдах Улсын Дурбан хотноо зохиогдсон Өсвөрийн шатарчдын дэлхийн аварга шалгаруулах тэмцээний найм хүртэлх насны ангилалд тэргүүн байр эзэлж, дэлхийн аваргын анхны цомоо авч байсан. Мөн Румын Улсын Мамаиа хотод өнгөрсөн оны есдүгээр сард болсон Өсвөрийн шатарчдын 14, 16, 18 насны ангиллын дэлхийн аварга шалгаруулах тэмцээнд 11 өргөөс 8.5 оноо авч хожигдолгүй түрүүлснээр дэлхий хошой аварга болжээ.

Дэлхийн хошой аварга, олон улсын шатрын холбооны мастер Д.Мөнхзул "Гэгээн арвай" клубийн шатарчин бөгөөд түүнийг их мастер Б.Гүндаваа дасгалжуулдаг.

Мөн Улсын Их Хурлын дарга Г.Занданшатар Монголын шатрын холбооны ерөнхийлөгч Э.Гурванбаатарт Азийн шатрын холбооны Зүүн Азийн бүсийг хариуцсан ерөнхийлөгчийн зөвлөхөөр томилогдон ажиллах болсонд нь баяр хүргээд Монгол Улсаас анх удаагаа энэхүү нэр хүндтэй албанд томилогдож байгааг онцлон тэмдэглэв.

Монголын шатрын холбооны ерөнхийлөгч Э.Гурванбаатар Улсын Их Хурлын даргад талархал илэрхийлээд Монголын шатрын холбооны ойрын хугацааны үйл ажиллагааны төлөвлөгөөний талаар товч танилцуулсан юм.

Уулзалтын үеэр Монгол Улсын шатарчдын багаар ажиллаж сэтгэн бодох, нэг зорилгын төлөө нэгдэх ур чадварыг нэмэгдүүлэх зорилгоор шинэлэг сонирхолтой хувилбараар нэг шатар дээр багаараа гүйж тоглох “Нэг монгол-Нэг нүүдэл” багийн тэмцээнийг  уламжлал болгон зохион байгуулах талаар ярилцаж, санал солилцов. Уг тэмцээнийг 2014 онд Улсын Их Хурлын дарга Г.Занданшатар анх санаачилж байжээ хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.