Өдрийн сурвалжлага: Орон гэргүй хүмүүс сонгууль шударга болох эсэхэд эргэлзэж байна

Сонгох, сонгогдох эрхээ эдэлж чадахгүй байгаа нийгмийн нэг хэсэг бол  гудамжны гэгдэх орон гэргүй хүмүүс. Тэдний хувьд сонгох эрхээ эдлэхийг хүсдэг ч боломж, бололцоо тааруу байгаагаа илэрхийлсэн юм.  Ингээд орон гэргүй хүмүүсийн төлөөлөл болгож таван хүнээс тодруулга авснаа хүргэе.

Б.Ганбат:  Талбай орж сонгуулийн сураг дуулна 

- Таньд иргэний үнэмлэх байгаа юу?

-  Байгаа. Ханын материалын амьдрах ухаан төв гэж байдаг ш дээ. Ахынх нь бичиг баримт бүгд тэнд байгаа.

- Иргэний үнэмлэхээ аваад сонгуулиа өгөх үү?

- Тэгмээр л байна. Даанч бие өвдөөд, автобусны мөнгө байдаггүй .  Ах нь гэр оронгүй ээ.  

-  Сонгууль ямар болох бол?

- Будлиантай сонгууль болох байх.  Ах нь талбай орж сураг дуулна.  Аль нам гарах юм бол сонирхоод л байна. Ахынх нь бодлоор Ардчилсан нам гарчих байх.

- Та эх орны хишгээ авсан уу?

- Ах нь ноднингийн 11 сард Мааньтын архины эмчилгээнээс гараад, халамжаас бичиг аваад  гурван сард дөрвөн зуугаад мянга авсан.  Сүүлийн хоёр сарынхаа мөнгийг тэгж байгаад авна.

- Шинээр байгуулагдах Засгийн газар үйл ажиллагааныхаа  чиглэлд юуг анхаарч ажиллаасай гэж бодож байна вэ?

- Иргэн бүртээ тулж ажиллаасай.  Хэн нь ч гарсан бай идэх нь тодорхой юм чинь над шиг ядарсан хүмүүсийн ажлын байранд анхаарвал баярлана. Уг нь манаач ч гэсэн хиймээр  л санагдах юм.  Одоо бид нарт чинь үзэмжээр нь хандаад байх юм байна ш дээ. /уйлав. сурв /

А.Болдбаатар: Намууд хувь тэнцүүхэн ширүүн өрсөлдөх биз

- Иргэний үнэмлэхтэй юу?

- Байхгүй.

- Тэгвэл энэ жил сонгууль өгөх боломжгүй байх нь ээ?

- Өнөөдөр гарч байна гэж  Дарханаас хэлж байна лээ. Удахгүй авна.

-  Энэ жилийн сонгууль ямар болох  бол?

- Мэдэхгүй ээ.  Намууд хувь тэнцүүхэн ширүүн өрсөлдөх биз. Өмнөх сонгууль шиг дайн дажин дэгдэхгүй байгаасай.

- Шинээр байгуулагдах Засгийн газар үйл ажиллагааныхаа  чиглэлд юуг анхаарч ажиллаасай гэж бодож байна вэ?

-  Эрүүгийн шинэ хууль батлагдсан ш дээ хэдэн жилийн өмнө.  Тэр хууль арай хатуу  юм  шиг санагдсан. Би ер нь хүний ухамсарт  хандаж хэлэхэд л хангалттай гэж боддог.

Р.Баярхүү  Б.Батбаатар : Намуудын мөрийн хөтөлбөр бүгд ижилхэн

- Сайн байцгаана уу? Та хоёр иргэний үнэмлэхтэй юу?

- Б.Батбаатар Байна.  

- Р.Баярхүү :Иргэний үнэмлэхний лавлагаа байгаа. Яг иргэний үнэмлэх бол байхгүй.  

-  Тэгвэл сонгууль өгөх нь ээ?

- Р.Баярхүү :Оролцолгүй яахав.

-  Саналаа өгсөн үү?

- Р.Баярхүү :Өгөх гэсэн учраа олохгүй байна.  Энүүгээр өгч болох болов уу? /Энэ оны гуравдугаар сард авсан иргэний үнэмлэхний лавлагааны  бичиг үзүүлэв/

- Сонгууль шударга болох болов уу?

- Б.Батбаатар Мэдэхгүй  ээ. Итгэхэд бэрх ш дээ. Дүнг нь л сонсох л бодол байна ш дээ.

-  Р.Баярхүү :Шударга болоосой  гэж хүсэж байна.  

- Намуудын мөрийн хөтөлбөртэй танилцсан уу?

- Р.Баярхүү :Аль ч намыг дэмжихгүй.  Манай аав МАХН-ын хүн.  Бид нар  тэр намаар л хүмүүжсэн улс.  Би МАХН-д хайртай.  

- Б.Батбаатар Ер нь намуудын мөрийн хөтөлбөрийг  харахад бүгдээрээ л ижилхэн юм шиг санагдсан ш дээ.

-  Эх орны хишгээс эхлээд халамж та бүхэнд хүрч чадаж байна уу?

- Б.Батбаатар Мэдэхгүй ээ. Та нарт л хүрч байгаа байх.  Бид нарт бол хүрэхгүй байгаа. Хүрэх ч үгүй биз.

Р.Найдан: Будлиантай ч гэсэн нэг нь гарах л байх даа

- Та иргэний үнэмлэхтэй юу?

-  Байгаа. Төв аймагт гэрт байгаа.  Үнэмлэхгүй болохоор одоо тэгээд сонгууль өгч болохгүй болчихлоо ш дээ. Уг нь регистрийнхээ дугаарыг мэднэ.  Гэхдээ регистрийн дугаараар санал өгүүлэхгүй байх л даа.

- Сонгуульд аль нам ялалт байгуулах бол?

- Одоо тэгээд будлиантай ч гэсэн нэг нь гарах л байх даа. Биднийгээ л харж үздэг байвал боллоо.

- Та халамжийн мөнгөө авсан уу?

- Бүгдийг нь авсан.  Би чинь группт байдаг болохоор мөнгөө бөөнд нь аваад байдаг юм.  

Гэр оронгүй иргэд  ч гэсэн сонгох эрхээ эдлэхийг хүсэж байгаа нь илт байлаа. Үүгээр ч зогсохгүй тэд өөрсдийн дуу хоолойгоо хүргэх бодолтой байгаагаа энэ үеэр хэлж байсан юм.  

А.Баярмаа