Жагсаалтаар нэр дэвшигчид түр үнэмлэхээ авлаа

СЕХ даргын  2012 оны 7 дугаар сар 4-ны өдрийн 135 тоот тогтоолоор өнөөдөр УИХ-ын гишүүний 28 суудлыг хуваарилах, гишүүний түр үнэмлэх олгов. Тодруулбал энэ тогтоолын жагсаалтын дагуу Монгол Ардын Намаас нэр дэвшсэн Сүхбаатарын Батболд, Ухнаагийн Хүрэлсүх, Дамдины Дэмбэрэл, Өлзийсайханы Энхтүвшин, Данзангийн Лүндээжанцан, Цэндийн Нямдорж, Нямаагийн Энхболд, Янгугийн Содбаатар, Жадамбын Энхбаяр нарыг, Ардчилсан Намаас нэр дэвшсэн Норовын Алтанхуяг, Зандаахүүгийн Энхболд, Хишигдэмбэрэлийн Тэмүүжин, Чимэдийн Сайханбилэг, Дондогдоржийн Эрдэнэбат, Шаравдоржийн Түвдэндорж, Раднаагийн Бурмаа, Цэвэлмаагийн Баярсайхан, Раднаасүмбэрэлийн Гончигдорж, Мигэддоржийн Батчимэг нарыг, “МАХН-МҮАН-ын Шударга ёс эвсэл”-ээс нэр дэвшсэн Чүлтэмийн Улаан, Намдагийн Батцэрэг, Мишигийн Сономпил, Зангадын Баянсэлэнгэ, Октябрийн Баасанхүү, Цэрэндашийн Цолмон, Цэрэндашийн Оюунбаатар нарыг, Иргэний зориг-Ногоон намаас нэр дэвшсэн Санжаасүрэнгийн Оюун, Самбуугийн Дэмбэрэл нарыг Монгол Улсын Их Хурлын гишүүнээр сонгогдсонд тооцож, Улсын Их Хурлын гишүүний түр үнэмлэх олгосон юм.

Жагсаалтаар УИХ-ын гишүүн болж байгаа нэр дэвшигчдэд УИХ-ын гишүүний үнэмлэхийг олгохдоо нам, эвслийн авсан нийт саналын таваас доошгүй хувийн санал авсан нам, эвслийг авсан саналын хувиар нь дараалалд оруулсан жагсаалтыг мөн түүнчлэн Улсын Их Хурлын гишүүний 28 суудлыг их үлдэгдлийн зарчмаар хувь тэнцүүлэн хуваарилсан суудлын тоог болон нам, эвслээс нэр дэвшигчдийг тухайн нам, эвслээс ирүүлсэн жагсаалтын дарааллаар эрэмбэлсэн гэдгийг СЕХ онцолсон.

Дашрамд дурьдахад МАН-ын 28, Ардчилсан намын 28, Монголын Ногоон намын 16, Иргэний зориг-Ногоон намын 24, БНН-Хамуг Монголын Хөдөлмөрийн намын “Гурав дахь хүчин” эвслийн 26, Иргэний хөдөлгөөний намын 18, Эх орончдын нэгдсэн намын 1 нэр дэвшигч жагсаалтаар сонгуульд оролцож байсан юм.

А.Баярмаа