МАХН-ынхан чаддаг юм бол яг одоо тамга, тэмдгээ өгчих

МАХН гүйцэтгэх товчоо уржигдар орой болтол хуралдахдаа огцом шантаажны шийдвэр гаргасан. Ингэснээр

1. Шадар сайд Д.Тэрбишдагва /МАХН-ын дэд дарга/
2. Сангийн сайд Ч.Улаан /Шударга ёс бүлгийн дэд дарга/
3. Эрүүл мэндийн Н. Удвал, /МАХН-ын Нарийн бичгийн дарга/
4. Хууль зүйн дэд сайд Э.Эрдэнэжамъян /МАХН-ын гүйцэтгэх товчооны гишүүн/
5. Байгаль орчин ногоон хөгжлийн дэд сайд Б.Тулга
6. Эдийн засаг, хөгжлийн дэд сайд О.Чулуунбат нарыг Засгийн газрын бүрэлдэхүүнээс татахаар болоод байгаа. Өөрөөр хэлбэл эрүүгийн хавтаст хэргийг улс төртэй хутгасан нь улс төрчдийн зэвүү дургүйг зэрэг хүргээд авсан.

“Шударга ёс” эвслийн удирдах зөвлөлөөр МАХН Засгаас гарах эсэхийг хэлэлцэнэ.  Удирдах зөвлөлийн дийлэнх  нь МАХН-ын гишүүд болохоор асуудал мэдээж  МАХН-ынхны талд шийдэгдэнэ. Тэгэхээр МАХН МҮАН-аа хөлдөө чирээд Засгийн газрын бүрэлдэхүүнээс гарах нь нэгэнт тодорхой болчихлоо.

МАХН-ын гишүүд ингэж зөрүүдэлж байгаа нь цаагуураа бас учиртай.  Өөрөөр хэлбэл МАХН засгаас гарна гэж МҮАН-ыг дарамталбал тохиролцох саналыг хэн хэн нь гаргана. Харин тохиролцоо нь УИХ-ын гишүүний нэг суудлыг МАХН  авах.  Өөрөөр хэлбэл Ц.Оюунбаатарыг “жийгээд” оронд нь Э.Батшугарыг УИХ-ын гишүүн болгох асуудлыг нэг мөсөн шийдэх гэсэн санаархал юм.  Уг нь Э.Батшугарт цэргийн алба хаах хүсэл сонирхол, тэмүүлэл байсан ч эрүүл мэндээрээ тэнцээгүй.  Тэгэхээр Э.Батшугарт УИХ-ын гишүүн болох болзлоо хангасан гэсэн үг.

Одоо харин ингэж хоёрын хооронд өөх ч биш, булчирхай  ч биш, шантаажилж байхаар нэг мөсөн Засгийн бүрэлдэхүүнээс гараад явчих хэрэгтэй гэдгийг УИХ-ын гишүүд хэлж байгаа. Ер нь ч тэгээд хувь, хувьсгалыг ялгалгүй айлын эрх хүүхэд шиг өөрийнхөө үзэл бодлыг тулгаж байхаар зайгаа тавиад өгчихвөл  хүн чанар, ёс зүйд нийцэх бөгөөд  нэр цэвэр байх алтан боломж МАХН-ынханд үлдэж байгаа юм. Яахав тэдний хөлд  Эрчим хүчний сайд М.Сономпил л чирэгдэнэ биз... Түүнийг улс төрийн хатуу тоглоомны  нэг золиос л гэж бодоход  болно доо.

А.Баярмаа