50:50 хувь уу, эсвэл...

Өнгөрөх долоо хоногийн сүүл хавьд УИХ бүл нэмж 73 болсон билээ. Баянзүрх дүүргээс дахин санал хураалтаар гарч ирсэн Д.Арвин, У.Хүрэлсүхийн оронд нөхөн намын жагсаалтаар гарч ирж буй Д.Сарангэрэл нарын хувьд бол “товчлуураа буруу дарж өөрийнхөө эсрэг санал өгсөн” гэх мэт хөгжилтэй хөөрхөн онигооноос өөрөөр гоочлоод байх зүйл бараг гарсангүй.

Харин Г.Уянга гишүүний хэлсэнчлэн “гуя дагаж хүзүү" болон орж ирж тангараг өргөсөн Г.Батхүү гишүүний талаар одоо болтол элдэв таамаг яригдан, нэг хэсэгтээ л хүмүүсийн амны зугаа болж байх шиг байна.

Уг нь хөндлөнгөөс харсан хэнд ч их гайхалтай сценари явагдаад өнгөрсөн гэж хэлж болохоор. МАН-ын нөхдүүд дөнгөж хэдхэн хоногийн өмнө л хэрэв Г.Батхүү, Д.Зоригт нарыг тангараг өргүүлчих юм бол Монголд ардчиллыг булшилсан хэрэг болно хэмээн эрс эсэргүүцэж, чуулганы танхимын хаалгыг буйдангаар таглан, цагаан толгойн баярт оролцож байгаа хүүхдүүд шиг янз бүрийн уриа лоозонтой цаас бариад суугаад байгаагүй бил үү. Онцлог нь тэдэнд даанч зохихгүй байсан л даа тэгж плакат барих нь, харин Гүндалайд жигтэйхэн гоё зохидог байсийн.

Гэтэл сая Г.Батхүү гишүүнийг тангараг өргөхөд МАН-ынхны зүгээс ганц ч эсэргүүцлийн үг ган хийсэнгүй. Энэ үнэхээр гайхамшиг биш гэж үү...

Хэн ч харсан,хамгийн адгийн хөлдүү дурак бодсон ч, энд ямар ч байсан нэг тохиролцоо хийгдсэн нь мэдрэгдээд байна. Тэгээгүй бол МАН-ын тэр хэдэн архаг акулууд яг дуугүй байж харагдаач!

Харин 50х50 хувь уу, эсвэл МАН-ын намын бүлэг байгуулах наймаалцал уу? Хүмүүсийн дунд ийм л таамаг яригдаж байна. Мөн Д.Зоригтдоо аятайхан “зөөлөн суудал” амлаад, тангараг өргүүлэлгүй үлдээчихлээ гээд л “тааж мэддэг Тансан лам” шиг ярьцгаагаад л.

 Нэг хэсэгтээ овоо мартагнаад байсан “МАНАН”-гийн хууч сэргэж эхэлсэн бололтой. Хэзээнээс тохиролцож, наймаалцаад хэл амаа ололцоод ирсэн болохоор “сурсан юмыг сураар боож болдоггүй” юм болов уу, яг л зарим салсан амрагууд хааяа “хуучнаа сэргээгээд” байдаг шиг...

Д.Мягмарсүрэн