Засгийн газрын хуралдаанаас гарсан шийдвэрүүд
- Мэргэжлийн боловсрол, сургалтын байгууллагын багшийн мэргэжлийн зэргийн нэмэгдэл хөлсний хувь хэмжээг тогтоох асуудлыг хэлэлцээд Засгийн газрын тогтоол гаргахаар боллоо. Ингэснээр мэргэжлийн боловсрол, сургалтын байгууллагын багш нарт мэргэшлийн зэргийн нэмэгдэл олгоход улсын төсөвт нэмэлт зардал шаардагдахгүй бөгөөд МСҮТ, политехник коллежууд цалингийн сандаа багтааж, эсвэл орлогын эх үүсвэрээсээ санхүүжүүлэх боломжтой болж байна.
- “Тээврийн хэрэгслийн оношилгоо, хяналт зохицуулалтын алба” улсын төсөвт үйлдвэрийн газрыг “Автотээврийн үндэсний төв” улсын төсөвт үйлдвэрийн газар болгон өөрчиллөө.
- “Монголын төмөр зам” төрийн өмчит хувьцаат компанид төмөр замын суурь бүтэц барих тусгай зөвшөөрөл олгосон ч концесс олгох шийдвэр гараагүй байсан. “Төрөөс төмөр замын талаар баримтлах бодлого”-ын хэрэгжилтийн хүрээнд төмөр замын суурь бүтцийг “барих-ашиглах-шилжүүлэх” концессийг “Монголын төмөр зам” ТӨХК-д олгохоор боллоо. Мөн “Шинэ төмөр зам“ төслийг хэрэгжүүлэхэд эхний ээлжинд шаардагдах 55 сая ам.долларын санхүүжилтийг энэ оны хоёрдугаар сард багтаан олгохыг Хөгжлийн банкны төлөөлөн удирдах зөвлөлд зөвшөөрсөн байна. Зээлийн эргэн төлөлтийг тухай бүрт нь улсын төсөвт тусгаж, шийдвэрлэхийг Эдийн засгийн хөгжлийн сайд Н.Батбаярт даалгалаа.
- Монгол Улсаас ОХУ-д суух онц бөгөөд бүрэн эрхт Элчин сайдаар Шүхэрийн Алтангэрэл, Их Британи, Умард Ирландын Нэгдсэн Вант улсад Нархүүгийн Тулга, Шведийн Вант улсад Зоригийн Алтай, Болгар Улсад Лхамсүрэнгийн Дүгэржав, Чех улсад Дорждамбын Зүмбэрэллхам нарыг томилуулах асуудлыг хэлэлцэн дэмжээд Монгол Улсын Ерөнхийлөгчид өргөн мэдүүлэхээр тогтлоо.
Холбоотой мэдээ
Copyright © 2010 - 2026 Zindaa.mn Developed by mCast LLC
Сэтгэгдэл ( 0 )