Шинзо Абэг ирэхээс өмнө зөвлөлджээ

Япон Улсын Ерөнхий сайд Шинзо Абэ манай улсад айлчлал хийх гэж байгаа талаар мэдээлсэн. Тэгвэл түүний айлчлалыг угтан Монгол Улсын Гадаад харилцааны яам, Япон Улсын Гадаад хэргийн яам хоорондын бодлогын хоёр дахь удаагийн зөвлөлдөх уулзалт Улаанбаатар хотноо болов. Зөвлөлдөх уулзалтыг монголын талаас ГХЯ-ны Бодлого төлөвлөлт, судалгааны газрын захирал Ц.Батбаяр тэргүүлсэн бөгөөд төлөөлөгчдийн бүрэлдэхүүнд Хөрш орнуудын газрын захирал Т.Төгсбилгүүн, Олон улсын байгууллагын газар, Ази Номхон далайн орнуудын газрын төлөөлөл тус тус оролцов.

Японы төлөөлөгчдийг Гадаад хэргийн яамны Нэгдсэн бодлогын газрын дэд захирал, Элчин сайд К.Ямазаки тэргүүлэн оролцсон бөгөөд уулзалтаар хоёр орны гадаад бодлогын тэргүүлэх чиглэл, Зүүн хойд Ази, Төв Азийн бүс нутгийн байдал, бүс нутгийн интеграци болон олон улсын тавцан дахь хамтын ажиллагааны талаар байр сууриа харилцан илэрхийлж, санал солилцов.

Мөн зөвлөлдөх уулзалтад оролцож буй Элчин сайд К.Ямазаки тэргүүтэй төлөөлөгчдийг Гадаад харилцааны дэд сайд Д.Ганхуяг хүлээн авч уулзав.