“Стэнд бай” хөтөлбөрт хамрагдвал МАН-ын мөрийн хөтөлбөр хэрэгжихгүйд хүрэх үү

Эдийн засгийн хүндрэлээс гарахаар Монгол Улсын Засгийн газар Олон улсын валютын сангийн тусламжийг авах тал дээр судалж, “Стэнд бай” хөтөлбөрт хамрагдах асуудлыг ярьж эхэлсэн. Үүний хүрээнд  ОУВС-ийн санхүүжилтийн ажлын хэсгийн төлөөлөл хоёр дахь удаагаа манай улсад ажилласан. Ингэхдээ Сангийн яам болон Засгийн газар ОУВС-ийн ямар хөтөлбөрт хамрагдах, ямар чиглэлээр өөрчлөлт, шинэчлэлт хийх зөвлөмж авах асуудлаар ярилцсан тухай эх сурвалжууд өгүүлж буй. 

Сангийн яам болон Засгийн газар  ОУВС-ийн ажлын хэсэгтэй ажиллаж "Standby credit facility" болон "Standby arrangement" гэсэн хоёр төрлийн санхүүжилтийн хөтөлбөрийн алинд нь хамрагдах эсэхийг шийднэ гэж байсан ч  хэлэлцээрийн явцад дээрх төрлүүд өөрчлөгдөж “Extended Fund Facility” хөтөлбөрийг хэрэгжүүлэх хувилбар яригдаж байгаа тухай зарим эх сурвалж мэдээлж байна.

Энэхүү хөтөлбөр нь гишүүн орнууддаа дунд болон урт хугацааны төлбөрийн тэнцлийн хүндрэлээс улбаатай суурь эдийн засагт үүссэн гажуудлыг бүхлээр нь даван туулахад тусламж үзүүлэх зорилготой хамгийн хүнд нөхцөлтэй хөтөлбөр аж. Мөн тус хөтөлбөр нь “Stand-by” хөтөлбөрөөс илүү урт хугацаатай байдгаараа онцлогтой юм. Дээд хугацаа нь дөрөв хүртэл жил байдаг  бөгөөд 4.5-10 жилийн хугацаатай сунгах боломжтой байдаг байна.

"Стэнд бай” хөтөлбөрт хамрагдахын тулд эхлээд зээлдүү­лэгчтэй харилцан тохиролцож санамж бичиг байгуулдаг. Энэ са­намж бичигт тавигдсан шаард­­л­агуудыг хөтөлбөр хэрэг­жих хугацаанд тухайн улс хэрэгжүүлдэг. Одоогоор Сангийн яаманд ОУВС-гаас “Extended fund facility” хөтөлбөрийн хүрээнд таван томоохон шаардлага тавьж буй талаар зарим хэвлэлүүд бичиж байна.

 Монгол Улсын Засгийн газраас Олон улсын валютын сан(ОУВС)-тай хийж байгаа хэлэлцээрийн талаар УИХ дахь МАН-ын бүлэг ээлжит бусаар өчигдөр 17 цагаас 21 цаг орчим хүртэл хуралдсан.  МАН-ын бүлэг ОУВС-гийн хөтөлбөрийг хэрэгжүүлэх нь зөв гэсэн шийдэлд хүрчээ. Гэхдээ хэлэлцээрийг арай уян хатан болгох чиглэлээр ажиллах шаардлага байна гэсэн зөвлөмжийг Засгийн газарт өгсөн байна. ОУВС-тай хийх хэлэлцээрийн асуудалд  МАН ийн нухацтай хандах нь зүйн хэрэг юм. Учир нь  МАН-ын 2020 он хүртэлх мөрийн хөтөлбөрийн ихэнх нь халамжтай холбоотой амлалтууд бий.  Хэрэв тус хөтөлбөрт хамрагдвал МАН-ын мөрийн хөтөлбөр хэрэгжихүйд хүрэх талтай. Учир нь ОУВС-ийн тавьдаг шаардлагууд шаталсан хэлбэрээр хэрэгжилтийн явцдаа явагддаг аж. 

ОУВС-тай хийж буй хэлэлцээрийнхээ үр дүнг Сангийн яамнаас удахгүй мэдээлэх учиртай. Түүнчлэн ирэх гуравдугаар сард манай улс Хөгжлийн банкны 580 сая ам.долларын бонд,  мөн ирэх оны нэгдүгээр сард төлөгдөх нөхцөлтэй 500 сая ам.долларын “Чингис бонд”-ын  төлөлт Засгийн газрыг хүлээж байна. 

Б.Алтжин