Их Британи Европын Холбооноос гарах үйл явц дууслаа

Их Британи Европын Холбооны бүрэлдэхүүнээс гарах үйл явц албан ёсоор дууслаа. Өнөөдрөөс /2021.01.01/ Европын Холбооны дүрэм журмыг мөрдөхгүй болсон Их Британийн хувьд шинэ эрин эхэлж байна.

Их Британийн Ерөнхий сайд Борис Жонсон “Brexit-ийн үйл явц дууссанаар бид эрх чөлөөгөө гартаа атгалаа. Цаашид илүү өөр, илүү сайн зохицуулалтуудыг хийх боломж бүрдэж байна” гэж мэдэгджээ. Харин Их Британийн сайд нар худалдааны дүрэм журам өөрчлөгдөж байгаатай холбоотойгоор ойрын хугацаанд тасалдал, саатал үүсэж болзошгүй хэмээн анхааруулсан байна.

Их Британи болон Европын Холбоо нь зул сарын баярын өмнөх өдөр худалдааны гэрээний талаар тохиролцоонд хүрч, Их Британийн парламент лхагва гарагт уг гэрээг эцэслэн баталснаар хүчин төгөлдөр болжээ.