Төрийн гурван өндөрлөгийн нэр хүнд өсчээ

Улстөрчдийн чансааг тодорхойлдог MEC байгууллагаас есдүгээр сарын судалгааны дүнгээ танилцууллаа. Судалгааг санамсаргүй түүврийн аргаар 1012 хүнтэй утсаар холбогдож авчээ.

Судалгаанаас харахад өнгөрсөн нэг сарын хугацаанд Монгол Улсын төрийн тэргүүн У.Хүрэлсүхийн нэр хүнд 0.2 функтээр өссөн байна.

Өөрөөр хэлбэл, өнгөрсөн долоо, наймдугаар сард 5.6 функт байсан Ерөнхийлөгч У.Хүрэлсүхийн нэр хүнд 5.8 болж өсчээ.

Тэгвэл УИХ-ын дарга Г.Занданшатарын тэргүүлсэн парламентын үйл ажиллагаанд өгсөн үнэлгээ өнгөрсөн сараас 0.1-ээр өсч, 3.8 функт болсон талаар судалгаанд дурдсан байна. Энэ нь өнгөрсөн оны есдүгээр сартай харьцуулахад 0.1 функтээр буурсан үзүүлэлттэй байгаа аж.

Харин Засгийн газрын тэргүүн, Ерөнхий сайд Л.Оюун-Эрдэнийн нэр хүнд өнгөрсөн наймдугаар сартай харьцуулахад 0.3 функтээр өсч, 5.7 функт болсон талаар МЕС судалгааны байгууллагаас тайландаа дурджээ.