Ц.Анандбазар: Хомсдол үүслээ гэх ташаа мэдээллээс болж иргэд хямарч байна

Монгол Улсын Засгийн газраас нефть импортлогчдыг үгсэж шатахууны хомсдол үүсгэсэн байж болзошгүй гэх мэдээллийг өгсөн билээ. Үүнтэй холбогдуулан "Сод Монгол" группын үүсгэн байгуулагч, УИХ-ын гишүүн Ц.Анандбазараас дараах тайлбарыг авлаа.

-Хоёр хоногийн өмнө шатахууны олгохгүй, хомсдол үүслээ гэх мэдээлэл түгсэн. Үүнийг төр, засгийн зүгээс тайлбарлахдаа нефть импортлогчдыг зохиомлоор хомсдол үүсгэхийг завдсан байж болзошгүй гэдэг зүйлийг ярьсан. Үүнд танай "Сод Монгол" холбоотой юу?

-Компанийн захирал нь албан ёсны тайлбар гаргасан байна билээ. Харсан биз дээ, та нар.

-Гэхдээ та нар Засгийн газраа "шантаажлаад" байгаа юм биш биз дээ?

-Төрд шахалт үзүүлэх боломжгүй. Хоёрт, зах зээл нэг компаниас хамаардаггүй. Гуравт, УИХ-ын гишүүн компанийн ажилд оролцдоггүй. Дээр нь, тав хоногийн нөөц бий. Тэр нөөц дээр нь сэтгүүлчид та бүхэн бодит бус мэдээлэл өгч, тэр мэдээллээс хүмүүс хямарч байгаа байх л гэж бодож байна.

-Гэхдээ төр, засгаас улс төрийн оролцоо байна гэж тайлбарлаад байгаа нь ямар учиртай юм бэ?

-Тийм зүйл байхгүй.

-Танайх шатахууны хэд хоногийн нөөцтэй байна вэ?

-10 хоногийн нөөцтэй байна.

-Тэгвэл өмнөх өдөр нь шатахууны нөөц байхгүй гэж мэдэгдчихээд маргааш нь нөөц бий гэдэг мэдээллийг өгсөн шүү дээ?

-Тэр техникийн алдаа, шалтгаантай л гэж тайлбарлсан байна билээ. Өөр зүйл байхгүй.

ВИДЕО ХЭЛБЭРЭЭР ЭНДЭЭС ҮЗНЭ ҮҮ!