Х.Ганхуяг: Үг хассан, нэмсэн, цэг таслалын ч ялгаа байхгүй

Хөрөнгө оруулалтын тухай хуульд нэмэлт өөрчлөлт оруулах тухай хуулийн төслийг УИХ-ын гишүүн Х.Булгантуяа Х.Ганхуяг, Д.Өнөрболор, П.Анужин нар санаачилсан гэгдэж буй. Гэвч УИХ-ын гишүүн  Д.Өнөрболор, П.Анужин нар уг төслөө эгүүлэн татахаа мэдэгдсэн. Учир нь тэдний боловсруулсан төслийг Х.Ганхуяг гишүүн өөрчилж, УИХ-ын даргад өргөн барьсан учраас Д.Өнөрболор, П.Анужин нар эсэргүүцэж байгаа аж.

П.Анужин гишүүн уг хуулийн санаачлагч хэдий ч өөрт нь танилцуулснаас өөр хуулийн төсөл өргөн барьсан тул эсэргүүцэж байгаагаа илэрхийлсэн.

Тэгвэл Х.Ганхуяг гишүүн "Дэгийн тухай хуулиар УИХ-ын гишүүн аль ч шатанд хуулийн төслийг эгүүлэн татах эрхтэй. Тэр эрхээ эдэлж байгаа байх. Одоо цаашид хэрхэхийг УИХ-ын Тамгын газартай ярилцах ёстой. Үг хассан, нэмсэн, цэг таслалын ч ялгаа байхгүй" гэсэн тайлбарыг өглөө.