Д.Баатарсайхан: Төрийн албаны сул орон тоог шударгаар бүрдүүлнэ

Төрийн албаны зөвлөлийн 2021 оны арванхоёрдугаар сарын 30-ны өдрийн хуралдаанаар “Албан тушаалын сул орон тоог нөхөх зарим арга хэмжээний тухай” 411 дүгээр тогтоолыг баталсан байдаг.

Тогтоолоор төрийн жинхэнэ албаны нөөцөд бүртгэлгүй, хууль, албан тушаалын тодорхойлолтод заасан тусгай шаардлагыг хангаагүй сонгон шалгаруулалтгүйгээр томилогдсон албан хаагчийг 2021 оны арванхоёрдугаар сарын 31-ний өдрөөр тасалбар болгон, албан үүргээс нь чөлөөлөхийг төрийн байгууллага, Төрийн албаны зөвлөлийн салбар зөвлөлүүдэд үүрэг болгосон юм. 

Төрийн албаны тухай хуулиар төрийн байгууллага, салбар зөвлөлүүд мэдэгдэл авснаас хойш 7 хоногийн дотор хариу өгч, 21 хоногийн дотор сул орон тоогоо нөхөх сонгон шалгаруулалтыг хийх ёстой аж.

Энэ талаар Төрийн албаны зөвлөлийн гишүүн Д.Баатарсайханаас тодрууллаа. 

Тэрбээр “Түр орлон гүйцэтгэгч гэх албан тушаал дээр байгаа хүмүүсийг хоёр талтай ойлгох ёстой. Жинхэнэ төрийн албан хаагчийн шалгалтаа өгч, жинхэнэ төрийн албан хаагч болсон хойноо аль нэг салбар газрын сонгон шалгаруулалтад орж, сонгогдон, “Түр орлон гүйцэтгэгч” болсон бол тэр хууль журмынхаа хүрээнд болж буй үйл явдал. Харин өнөөдрийн ажиллаж буй түр орлон гүйцэтгэгч гэх албан тушаалтай бизнес, улс төр, төрийн үйлчилгээний албанаас авчран, төрийн албанд тавьсан энэ зохицуулалт бол “Түр орлон” гэх жинхэнэ утгаараа хэрэгжиж буй асуудал биш" гэж тайлбарлалаа. 

Дашрамд өгүүлэхэд, “Албан тушаалын сул орон тоог нөхөх зарим арга хэмжээний тухай” 411 дүгээр тогтоолын хүрээнд 1032 албан хаагчийг чөлөөлөх ёстой бөгөөд одоогоор 500 гаруй алба хаагчийн асуудал шийдэгдээд байгаа ажээ.