Л.Бямбасүрэн: Орон сууцыг үнэгүй тараагаагүй, зээлээр өгсөн

ЭМДЕГ-ын дарга Л.Бямбасүрэн Капитал банкны өрөнд авсан орон сууцыг даатгалынхаа ажилчдад тараасан гэх шүүмжлэлийг УИХ-ын гишүүд хэлж байна.

Энэ талаар тэрбээр дараах тайлбарыг өглөө “Манайх өрөндөө Капитал банкны эрх хүлээн авагчаас 29 орон сууц хүлээн авсан. ЭМД-ын үндэсний зөвлөлийн 2021 оны 11 дүгээр тогтоолоор ЭМД-ын сангийн авлагад үл хөдлөх хөрөнгийг хүлээн авах, хадгалах, ашиглах, түрээслүүлэх, худалдан борлуулах журам батлагдсан. Энэ журмын 6 дугаар зүйлийн 6.37 дахь хэсэгт ЭМДЕГ нь сангийн авлагад тооцон авсан орон сууцыг ЭМД-ын байгууллагын албан хаагчид болон иргэн хуулийн этгээдэд банкны зээлээр болон бэлэн мөнгөөр худалдан борлуулах ажлыг зохион байгуулж болно. Энэ тохиолдолд дуудлага худалдааг зохион байгуулахгүйгээр шийдвэрлэнэ гэж заасан байгаа. Капитал банкны өрөнд авсан орон сууцыг ЭМД-ын ажилтан албан хаагчдад зүгээр өгөөгүй. Зах зээлийн үнийн дүнгээр, банкны зээлэнд хамрагдаад, авах боломжийг нээж өгсөн. Капитал банкны эрх хүлээн авагчаас 29 орон сууц авснаас 19 нь 80 хүртэлх мкв-тай байсан. Ингээд ажилтнууд маань банкны зээлэнд хамрагдаад, мөнгө нь  ЭМД-ын санд орсон” гэв.

Нэмэлт мэдээлэл хүргэхэд Капитал банкны өр төлбөрийг барагдуулахын тулд 195 ширхэг үл хөдлөх хөрөнгө хүлээн авсан талаар Хууль зүй дотоод хэргийн сайд Х.Нямбаатар дараах мэдээллийн өнгөрсөн хоёрдугаар сард өгч байсан юм. 

Хууль зүй дотоод хэргийн сайд Х.Нямбаатар:

-Капитал банкийг 2019 оны дөрөвдүгээр сарын 8-ны өдөр татан буулгахад Монголбанкны хяналт шалгалтын тайлангаар Эрүүл мэндийн даатгалын ерөнхий газар, Нийгмийн даатгалын ерөнхий газарт нийт 240 тэрбум төгрөгийн өр төлбөр барагдуулах тооцоо гарсан. Энэ дагуу эрүүгийн хэргийн мөрдөн шалгах ажиллагааны явцад Капитал банкны харилцахад байсан үлдэгдэл бэлэн мөнгөнөөс тус бүр хоёр даатгалын санд 7.7 тэрбум төгрөгийн мөнгийг шилжүүлсэн. Битүүмжлэгдсэн эд хөрөнгөнөөс эрүүл мэндийн даатгалын санд 36.5 тэрбум төгрөгийн үнэ бүхий үл хөдлөх эд хөрөнгийг, НДЕГ-т 22.1 тэрбум төгрөгийн үнэ бүхий эд хөрөнгийг шилжүүлж өгсөн. Тухайн газрууд уг шилжүүлэн авсан эд хөрөнгийг өөрсдийн үндэсний зөвлөлөөс гаргасан журмын дагуу дуудлага худалдаагаар худалдан борлуулж, сангуудад эргэн төвлөрүүлэх байдлаар явж буй талаарх мэдээллийг бид нарт өгсөн.

Капитал банканд хураагдсан битүүмжлэгдсэн хөрөнгийг шилжүүлэхээр тохирсон. Өнөөдрийн Засгийн газрын хуралдаанаас үлдэгдэл 118 тэрбум төгрөгийн үнэ бүхий 195 ширхэг үл хөдлөхийн барилга, үнэлгээ бусад эд хөрөнгийг дээр дурдсан хоёр санд хувь тэнцүүлэн шилжүүлэхээр боллоо.

Энэ ажил ойрын хугацаанд хийгдэж дуусна. Битүүмжлэлийг дуусгаж шилжүүлж өгснөөр дээрх сангууд дуудлага худалдаагаар үнэ хаялцуулан худалдах ажил хийгдэнэ.

Битүүмжлэгдсэн эд хөрөнгө дотор:

•             44 үйлчилгээний объект 52.4 тэрбум төгрөг,

•             7 үйлдвэр 1.9 тэрбум төгрөг,

•             46 орон сууц 32 тэрбум төгрөг,

•             82 газар 26.6 тэрбум төгрөг,

•             4 зоорь 2.3 тэрбум төгрөг,

•             3 дуусаагүй барилга 656 сая төгрөг,

•             7 фермийн барилга 228 сая төгрөг,

•             6 гарааш 564 сая төгрөг гээд нийт 195 ширхэг үл хөдлөхийн барилга байна" гэлээ.