Ахмадууддаа ойн медалиа гардууллаа

Монголын ууган нам болох Монгол Ардын Намын удирдлагууд 90 жилийнхээ түүхт ойн арга хэмжээний хүрээнд улс эх орноо хөгжүүлэх их үйлсэд гар бие оролцсон ахмадуудыг өчигдөр хүлээн авч уулзан ойн баярын медалиа гардууллаа.

Уулзалтад хувьсгалт тэмцлийн анхны зүтгэлтнээс эхлээд 1980-1990 онд эх орныхоо хөгжил цэцэглэлтийн төлөө зүтгэж ирсэн нам төрийн зүтгэлтнүүд нийгмийн бүхий л салбарт ажиллаж байсан 300 гаруй ахмад хүрэлцэн ирсэн байлаа.

Уулзалтыг нээж МАН-ын дарга, Ерөнхий сайд С.Батболд хэлсэн үгэндээ "Ардын хувьсгал, Ардын намын 90 жилийн ойн баярын мэндийг юуны өмнө Та бүхэндээ хүргэе. Баярын хүрээнд зохион байгуулж байгаа ажлуудаас гол арга хэмжээ нь эх орныхоо хөгжилд хувь нэмрээ оруулсан ахмадуудаа шагнах юм. Намынхаа мянга, мянган гишүүд дэмжигчдийнхээ өмнөөс 90 жилийн ойн халуун баярыг хүргэе. Эх орны маань түүхийн түүчээ нь Та бүхэн. Тухайн цаг үеийнхээ өмнө тулгарсан томоохон сорилт бэрхшээлүүдийг Та бүхэн л даван туулж ирсэн. Иймээс үйл хэргээр тань үргэлж бахархаж явна" хэмээн онцолсон юм.

Эх сурвалж: МОНЦАМЭ