ЮНЕСКО-гийн Ерөнхий захирал манай улсад айлчилна

Монгол Улсын Ерөнхий сайд С. Батболдын урилгаар ЮНЕСКО-гийн Ерөнхий захирал хатагтай Ирина Бокова  7 дугаар сарын 9-12-ны өдрүүдэд манай улсад айлчлах гэж байна.  Тэрбээр  Үндэсний их баяр наадам, ардын хувьсгалын 90 жилийн ойд   Монгол Улсын Ерөнхий сайдын хүндэт зочноор уригдаж байгаа юм. ЮНЕСКО-гийн Ерөнхий захирлын энэ удаагийн айлчлал нь Монгол Улс  - ЮНЕСКО-гийн харилцаа, хамтын ажиллагааг өргөжүүлэн хөгжүүлэх, хамтын ажиллагааны цаашдын хүрээг тодорхойлоход чухал ач холбогдолтой болж байгаа юм. Нөгөөтэйгүүр Монгол Улс НҮБ-д элссэний 50 жилийн ойг тэмдэглэх жил айлчилж байгаагаар онцлог болж байна.

Монгол Улс ЮНЕСКО-д 1962 онд элссэн бөгөөд өнгөрсөн 49 жилийн хугацаанд ЮНЕСКО-гийн дөрвөн  Ерөнхий захирал манай улсад  айлчилж байжээ.

Ерөнхий захирал хатагтай И. Боковагийн айлчлалын үеэр Монгол Улсын Засгийн газар, ЮНЕСКО-гийн хооронд хамтран ажиллах харилцан ойлголцлын санамж бичгийг байгуулна. Мөн эрхэм зочин   Нийслэлийн Сүхбаатар дүүрэгт орших “ЮНЕСКО-гийн гудамж” болон   МҮОНРТ-ийн хоёрдугаар сувгийн нээлтийн арга хэмжээнд  тус тус оролцох ажээ. Хатагтай Ирина Бокова Бүгд найрамдах Болгар улсын харьяат бөгөөд ЮНЕСКО-гийн Ерөнхий захирлын албанд 2009 оны 11 дүгээр сард томилогдсон юм байна  гэж Засгийн газрын Хэвлэл, мэдээллийн албанаас мэдээллээ.

Zindaa.mn-Үндэсний чөлөөт мэдээллийн портал