Н.Алтанхуяг: МАН-ынхан бодлогоо нэгтгэхгүй бол улс чинь дампуурлаа

УИХ-ын намрын ээлжит чуулганы өнөөдрийн /2022.10.06/ нэгдсэн хуралдаан үргэлжилж байна.

Хуралдаанаар “Төрөөс мөнгөний бодлогын талаар 2023 онд баримтлах үндсэн чиглэл батлах тухай” Улсын Их Хурлын тогтоолын төсөл /Монголбанкнаас 2022.09.27-ны өдөр ирүүлсэн, хэлэлцэх эсэх/-ийг хэлэлцэж байна. 

Хэлэлцэж байгаа асуудалтай холбогдуулан гишүүд асуулт асууж, байр сууриа илэрхийлж байгаа юм. 

Энэ үеэр УИХ-ын гишүүн Н.Алтанхуяг "Манай МАН-ын 62-оо бодлого чинь биш байна даа. Үүнээс болоод юм явахгүй байна. Мэдээж хүндрэл, бэрхшээл байгаа. Гэхдээ хүндрэл, бэрхшээлтэй тэмцэнэ, зохицуулна гэж л Монголбанк байдаг байлгүй дээ. Гэтэл Хятад, Орос л буруутай гэх утгатай зүйл яриад байх юм. Одоо яаж ард түмний ахуйн амьдралыг ярих юм. Төсвийнхөө бодлогыг уялдуулаач дээ. Одоо Сангийн сайд нь төсөв оруулж ирнэ. Наад мөнгөний бодлогыг хуцав аа гэдэг төсөв байна билээ. Ингэж болох юм уу, нэг улс шүү дээ" гэв. 

Түүнчлэн "Төсвийн үр ашиггүй хөрөнгө оруулалт, элдэв зүйлээ зогсоо. Тойргийнхоо мөнгийг боль гэж зөндөө л хэллээ шүү дээ, би. Бодлого чинь зөв байх ёстой. Юмны үнийн өсөлтийг та нар зогсоож чадахгүй юм байна. МАН дотроо бодлогоо зохицуулж, ард түмнээ гэсэн сэтгэлтэй зүйл хийхгүй бол улс орон чинь дампуурлаа. Хээл хахуул гэдэг чинь бүх салбарт хэрээс хэтэрлээ. Тэгээд л энд орж ирэхээрээ гоё гоё зүйл ярих юм аа. Та нарыг хэдэн жил хүлээж байна вэ, одоо ард түмэн чинь туйлдлаа шүү дээ. Ядаж л хэрэгтэй, хэрэггүй барилга төсвийн мөнгөөр битгий барь л даа" хэмээн байр сууриа илэрхийллээ.