Хамтарсан засгаас ЮУГ ХҮЛЭЭЖ, ШААРДАХ вэ?!

-Хамтарсан Засгийн газрын 2024-2028 оны үйл ажиллагааны хөтөлбөрийг хэдхэн хоногийн өмнө УИХ-аар хэлэлцэн баталлаа. Харин олон нийт хамтарсан Засгийн газраас ирэх дөрвөн жил юуг хүлээж, шаардах вэ-

Үндсэн хуулийн нэмэлт, өөрчлөлтөөр УИХ-ын 2024 оны ээлжит сонгууль явагдаж, 76 гишүүнтэй байдаг парламент 126 гишүүнтэй болсон. Хэдийгээр энэ удаагийн ээлжит сонгуульд МАН ялалтаа бататгасан ч улиран сонгогдсон Ерөнхий сайд Л.Оюун-Эрдэнэ Засгийн газартаа АН, ХҮН намыг урьж, хамтарсан Засгийн газрыг байгуулсан билээ.

Ерөнхий сайд, МАН-ын дарга Л.Оюун-Эрдэнэ болон АН-ын дарга Л.Гантөмөр, ХҮН намын дарга Т.Доржханд нар “ХУРДТАЙ ХӨГЖЛИЙН ТӨЛӨӨХ ЗОРИГ” гэрээнд гарын үсэг зуралцаж, Засгийн газрын 2024-2028 оны үйл ажиллагааны хөтөлбөрөө парламентад өргөн барьсан юм. Тэгвэл хамтарсан Засгийн газрын 2024-2028 оны үйл ажиллагааны хөтөлбөрийг хэдхэн хоногийн өмнө УИХ-аар хэлэлцэн баталлаа. Харин олон нийт хамтарсан Засгийн газраас ирэх дөрвөн жил юуг хүлээж, шаардах вэ.

МАН-ын дарга, өнөөгийн Ерөнхий сайд Л.Оюун-Эрдэнэ Засгийн газрынхаа 2024-2028 оны үйл ажиллагааны хөтөлбөрөө парламентад өргөн барьж, танилцуулахдаа хэд хэдэн зүйлийг онцолсон байдаг. Юуны өмнө энэхүү хөтөлбөр нь бүхэлдээ “Алсын хараа-2050” урт хугацааны бодлого, Шинэ сэргэлтийн бодлого хийгээд гурван намын мөрийн хөтөлбөрт туссан онцлог заалтуудыг нэгтгэж, хөгжлийн тулгамдсан асуудлыг улстөржихгүйгээр хурдтай шийдвэрлэх, олон жил гацсан томоохон төслүүдийн зангилааг тайлахад чиглэжээ. Тухайлбал, Монгол Улсын “Алсын хараа-2050” урт хугацааны хөгжлийн бодлоготой уялдуулж иргэд нийгмийн бүхий л үйлчилгээг 20-хон минутад авах хүнээ бодсон, шинэ стандарт бүхий “амьд хот”-ыг бий болгох цогц шийдлийг боловсруулсан аж. Ингэхдээ Толгойтоос Амгалан хүртэл 17.7 км үргэлжлэх “Метроны нэгдүгээр шугам”-ыг ашиглалтад оруулах, эртний нийслэл Хархорум хотыг сэргээн босгох, Үндэсний баялгийн сангаар дамжуулж орон сууцжуулах ажлыг “Бүсчилсэн хөгжлийн бодлого”-тойгоо уялдуулахаар шийджээ. Түүнчлэн бүс бүрийг нийгэм, эдийн засгийн хөгжлөөр нь төрөлжүүлэхээр тусгасан талаар Ерөнхий сайд Л.Оюун-Эрдэнэ тодотгосон билээ. Түүнчлэн хамтарсан Засгийн газрын 2024-2028 оны үйл ажиллагааны хөтөлбөрт “Гашуунсухайт-Ганцмод”, “Ханги-Мандал”, “Шивээхүрэн-Сэхээ” зэрэг хилийн боомтуудыг дамнасан холболтын төмөр зам, ачаа тээврийн терминалыг барьж дуусгана. “Тавантолгой”-н 450 мегаВаттын хүчин чадалтай дулааны цахилгаан станцыг барих, Эгийн голын 310 мегаВаттын усан цахилгаан станцын төслийг хэрэгжүүлэх аж. Хамгийн гол нь, говийн бүсэд зайлшгүй шаардлагатай Хэрлэн-Тооно, Орхон-Онги ус дамжуулах шугам, цогцолборыг барихаас гадна Монгол-Францын хамтарсан уран, атомын цахилгаан станцын ажлыг эхлүүлэх, Зэс боловсруулах цогцолбор болон гангийн үйлдвэр, Газрын тос боловсруулах үйлдвэрийг барьж, ашиглалтад хүлээлгэж өгнө гэдгээ хамтарсан Засгийн газрын ирэх дөрвөн жилийн үйл ажиллагааны хөтөлбөртөө тусгаж өгчээ.

Хамтарсан Засгийн газраас хөдөлмөр эрхлэлтийг дэмжих чиглэлд хэд, хэдэн ажлыг хийхээр болжээ. Бүс, орон нутгийн хөдөлмөрийн зах зээлийн онцлогт нийцсэн хөдөлмөр эрхлэлтийг дэмжиж инновацад суурилсан гарааны бизнесийн хөрөнгө оруулалт, санхүүжилтийн орчныг сайжруулна. Гадаадад ажиллаж амьдарч байгаа Монгол Улсын харьяат иргэдийг эх орондоо эргэн суурьшихад чиглэсэн цогц арга хэмжээг хэрэгжүүлж, бизнес эрхлэх, зөвлөгөө өгөх үйлчилгээг хөгжүүлэх аж. Ядуурал, ажилгүйдэл болон хүн амын амьжиргааны түвшнийг тооцох аргачлалыг үндэсний онцлогт нийцүүлж, их өгөгдөл, хиймэл оюун ухаанд суурилан шинэчилнэ. Монгол хүний хөдөлмөрийн бүтээмж, цалин хөлсийг нэмэгдүүлнэ. Зайнаас, цахимаар, цагаар ажиллах хөдөлмөр эрхлэлтийг дэмжиж, эрх зүйн орчныг сайжруулна, тэтгэврийн хэмжээг инфляц, хүн амын амжиргааны доод түвшинтэй уялдуулан жил бүр нэмэгдүүлэхээр болжээ.

Мөн Ипотекийн зээлийн санхүүжилтийн 50-аас багагүй хувийг дэд төв, дагуул хот, гэр хорооллын өрхөд олгоно. Гадаадын банкны салбар нэгжийг дотоодын зах зээлд нэвтрүүлж, гадаадын хөрөнгө оруулалттай банк, санхүүгийн байгууллагыг байгуулна. Үндэсний баялгийн сангийн тогтолцоог бэхжүүлж, Үндэсний баялгийн сангаар дамжуулан эрүүл мэнд, боловсрол, орон сууцжуулалт, хуримтлалын хөтөлбөрийг хэрэгжүүлж, “И-Монгол” платформоор дамжуулан иргэн бүрд хуримтлалын данс нээнэ. Иргэн эрүүл мэндийн тусламж, үйлчилгээг орон зай, цаг хугацаанаас үл хамааран авах боломжийг нэмэгдүүлж, цахим эрүүл мэндийн дэвшилтэт технологи телемедицин, хиймэл оюун ухааныг эмчилгээ, оношилгоо, хяналтад нэвтрүүлнэ. Олон улсын чанартай 88 км “Шинэ тойрог зам”, Туулын хурдны замыг барьж, ачаа тээврийн хөдөлгөөнийг хотын гадуур тойруулна. Хууль бусаар олгосон газрыг нийтийн эзэмшлийн газар болгож, уг газарт ногоон байгууламж, цэцэрлэгт хүрээлэн барьж, хотын иргэн оршин суугаа газраасаа 400 метр дотор амарч, тухлах нөхцөлийг бүрдүүлнэ.

Их, дээд сургуулийн хөтөлбөрт өөрчлөлт оруулж, Зэвсэгт хүчний анги, байгууллагад хугацаат цэргийн алба хаах хугацаандаа цахимаар, зайнаас суралцах орчин нөхцөлийг бүрдүүлнэ. Аялал жуулчлалын томоохон парк, цогцолборыг бүсчилсэн хөгжлийн хүрээнд байгуулж, шашин, соёл, спорт, адал явдалт аялал зэрэг дөрвөн улирлын аялал жуулчлалыг хөгжүүлнэ зэрэг 577 багц үйл ажиллагааны хөтөлбөрийг хэрэгжүүлэхээр төлөвлөөд байгаа аж. Эдгээрийг хэрэгжүүлэхэд ойролцоогоор 120 их наяд төгрөгийн санхүүжилт шаардлагатай гэдгийг ч тооцоолжээ.

Ямартай ч Ерөнхий сайд Л.Оюун-Эрдэнийн АН-ын дарга Л.Гантөмөр, ХҮН намын дарга Т.Доржханд хоёртой гар барьж, байгуулсан хамтарсан Засгийн газар ирэх дөрвөн жилийнхээ үйл ажиллагааны хөтөлбөрөө батлуулаад авлаа. Хөгжлийг хөөж биш угтаж түрүүлэхийг зорьж байгаа хамтарсан Засгийн газрыг олон нийт ажлаа хийхийг шахаж, шаардах л үлдлээ. Харин хэрхэн ажиллав гэдгийг нь дүгнэх цаг эрт байна.