Жессигээс зургаан цагийн турш байцаалт авч, шинэ хохирогч гарч ирэв

Өмнөд Солонгосын алдартай эмэгтэй реппэр болох Жесси бусдын биед халдсан хэрэгт яллагдагчаар татагдаад байгаа билээ. Түүнийг Ганнам дүүрэгт найзуудын хамтаар явж байх үед нэгэн шүтэн бишрэгч нь хамтдаа зургаа авахуулахыг хүссэн бөгөөд Жесситэй хамт явж байсан хүмүүс уг шүтэн бишрэгчийнх нь биед халдаж, улмаар шүтэн бишрэгч нь тэднийг шүүхэд өгчээ. 

Жесси уг шүтэн бишрэгчийнхээ биед халдаагүй ч хохирогч түүнийг шүүхэд өгсөн учир ийнхүү уг хэрэгт яллагдагчаар татагджээ. Цагдаа нар түүнээс аравдугаар сарын 16-нд байцаалт авч эхэлсэн ба өнөөдөр өглөө буюу аравдугаар сарын 17-ны үүрээр сулласан байна. 

Түүнийг байцаалт өгч байх хооронд 11 жилийн өмнө түүний хохирогч болж байсан гэх эмэгтэй гарч ирэв. Тэрээр Америк-Солонгос гаралтай нэгэн байсан бөгөөд 2013 оны тавдугаар сард Итэвон дахь нэгэн шөнийн цэнгээний газрын ариун цэврийн өрөөнд Жесси болон түүний хоёр найзын халдлагад өртсөн гэжээ.

Энэ тухайгаа хохирогч гэх эмэгтэй "Тухайн үед би Жесси болон түүний найзуудтай шөнийн цэнгээний газрын ариун цэврийн өрөөнд тааралдсан. Тэд ямар ч үндэслэлгүйгээр маргаан өдөөж, миний толгойг суултуурт хийхийг оролдсон. Би тэднээс мултарч чадсан ч тэд миний хэтэвчийг авч, намайг өвдөг сөгдөн уучлалт гуйсан тохиолдолд эргүүлж өгнө гэж хэлсэн" гэжээ. 

Хохирогч гэх бүсгүй цагдаагийн газар гомдол гаргасан ч удалгүй гомдлоо эргүүлэн авчээ. Чухам яагаад гомдлоо эргүүлэн татах болсон тухайгаа тэрээр "Энэхүү хэрэг намайг Америк руу ажлаар буцахаар төлөвлөж байсан үед болсон. Би онгоцны тийзээ хэдийнэ худалдаад авчихсан байсан. Хэрэг шийдэгдэх хүртэл жил орчмын хугацаа шаардлагатай, энэ хугацаанд гадаадад зорчих боломжгүй учраас гомдлоо эргүүлэн татсан. Намайг гомдлоо татсаны дараа Жесси энэ хэрэгт өөрийгөө ямар ч буруугүй гэх утгатай мэдэгдэл хийсэн байсан. Энэ удаад ч тэр камерын бичлэг байхгүй байсан бол өөрийгөө гэм буруугүй гэж мэдэгдэх байсан гэдэгт эргэлзэхгүй байна" хэмээсэн байна. 

Реппэр Жесси зургаан цаг байцаалт өгснийхөө дараа болсон үйл явдалд уучлалт хүсжээ.