ХЭН ЮУ ХЭЛЭВ I Л.Мөнхбаясгалан: Ерөнхий сайдтай 20 минут мэтгэлцэнэ

Энэ удаагийн “ХЭН ЮУ ХЭЛЭВ” буланд Сангийн сайд Б.Жавхлан, УИХ-ын гишүүн Э.Болормаа, УИХ-ын гишүүн Л.Мөнхбаясгалан нарын хэлсэн үгийг онцолж байна.

УИХ-ын гишүүн Л.МӨНХБАЯСГАЛАН:

Энэ баасан гараг буюу аравдугаар сарын 25-ны өдрийн УИХ-ын нэгдсэн чуулган дээр Ерөнхий сайд Л.Оюун-Эрдэнийн мэдээлэл хийх үеэр Боомтын сэргэлтийн бодлогын хэрэгжилтийн талаар сөрөг хүчнээ төлөөлж, 20 минут мэтгэлцэхээр боллоо. Хоёр талын микрофоныг 20 минутын турш нээж ярилцах юм байна. Иргэдээс ирсэн асуултыг асуух хүрээнд явагдаж, АН-ын бүлгийн гишүүд бас асуулт асуух дэгтэй ажээ.

Сангийн сайд Б.ЖАВХЛАН:

Татварын дарамт гэдэг нь өөрөө харьцангуй ойлголт. Ямар ч дарамтгүй татвар гэж байхгүй. Тэгэхээр татварын дарамтыг ямар өнцгөөс яаж харж байна, хяналт шалгалт дээрээ дарамттай байна уу, тайлагнаж байгаа дээрээ дарамттай байна гэдгийг нь харж байж сайжруулах хэрэгтэй. Сүүлийн жилүүдэд татварыг ил тод байлгах, тайлагналтыг хялбаршуулах ажил хийгдэж байна. Ялангуяа жижиг дунд үйлдвэрлэл эрхлэгч, малчид, иргэдийн санхүүгийн боловсролыг дээшлүүлэх үйл явц үр дүнгээ өгч байгаа. Засгийн газрын 100 хоногийн ажлын эхний удаа татварын реформ хийх үүрэг авсан. Нийгмийн даатгалын шимтгэлийг мөн олон талаас нь харах хэрэгтэй. Энэ бол татвар биш. Ажил олгогч, ажилтан талаасаа ирээдүйд тэтгэвэрт гарахдаа хэрэглэх зорилгоор хадгалж байгаа хуримтлал шүү дээ.
 

УИХ-ын гишүүн Э.БОЛОРМАА:

Хэрэв би буруу санаагүй бол Сангийн яам дээр хэлэлцэж байсан өндөр үнэтэй машины татвар зэргийг яагаад оруулж ирээгүй юм. Манай Монгол Улс бараг л нэг хүн ноогдох “Ланд-300” машины хэмжээгээр дэлхийд нэгдүгээрт жагсаж байгаа байх. Зөвхөн 2024 оны байдлаар 3000 гарчихсан л явж байна. Эдгээр өндөр үнэтэй асуудал дээр татвар нэмэх асуудлыг бодсон уу. Бид төсвийн орлогыг салбартай нь уялдуулах хэрэгтэй. Жишээ нь, замын засварын мөнгө нь шатахуунаас нь татвар авдаг байх ухаалгаар хийх арга байдаггүй хэрэг үү.