ХЭН ЮУ ХЭЛЭВ I А.Ганбаатар: Ардчиллын үнэт зүйлийн гол суурь бол чөлөөт хэвлэл

Энэ дугаарын “Хэн юу хэлэв” буланд Эрүүл мэндийн сайд Т.Мөнхсайхан, УИХ-ын гишүүн А.Ганбаатар, АНУ-ын Гадаад бодлогын хүрээлэнгийн судлаач Л.Бямбаханд нарын хэлсэн үгээс онцлов.

УИХ-ын гишүүн А.Ганбаатар:

-Ардчиллын үнэт зүйлийн гол суурь бол чөлөөт хэвлэл. Чөлөөт хэвлэлийг Эрүүгийн хуулиар хааж боогдуулах, өөр ямар нэгэн журмаар зохицуулах боломжгүй. Сэтгүүлч, редакц алдаа гаргасан ч асуудал шүүх дээр очихоос өмнө Хэвлэлийн зөвлөл гэдэг бүтцээр дамжуулж зөвхөн өөрөө, өөрийгөө зохицуулах боломжийг бүрдүүлэх ёстой юм. Хэвлэлийн зөвлөл өөрөө бүх хэвлэлүүдээ өөртөө нэгтгэсэн, хариуцлага тооцох чадамжтай байх ёстой. Хэрвээ тэгж чадвал бусад хэвлэлийн байгууллагуудаа өмөөрөх чадалтай, Хэвлэлийн зөвлөл амьдрах чадвартай болно.

Эрүүл мэндийн сайд Т.Мөнхсайхан:

-Хавдрын эмнэлэг барилаа гээд хавдрууд эрт оношлогдох уу, иргэд хавдраар өвчлөхөө болих уу гэдгийг бодох ёстой. Хавдрын өвчлөлөөс хэрхэн сэргийлэх, яаж эрт оношлох вэ, нэгэнт өвчилсөн бол иргэдэд хүндрэл учруулахгүйгээр тухайн амьдарч байгаа бүс нутагт нь эмнэлгийн чанартай тусламж үйлчилгээг яаж хүргэх вэ гэдэг бодлого руу төвлөрч үндэсний таван баг байгуулсан.

АНУ-ын Гадаад бодлогын хүрээлэнгийн судлаач Л.Бямбаханд:

-Украины асуудлаар АНУ-ын Ерөнхийлөгчид нэр дэвшигч Д.Трамп, К.Харрис нарын байр суурь тодорхой харагдсан. Д.Трамп бол дайныг яаралтай зогсоож хэлэлцээ хийх ёстой гэж байгаа. Энэ нь нэг талдаа Украины талд алдагдалтай. К.Харрисын төлөөлдөг Ардчилсан намынхан Украиныг дэмжсэн хэвээр байх болно. Украин бол Европын аюулгүй байдал, НАТО-гийн холбоотнуудад маш чухал бүс учир дэмжсэн хэвээр байна гэж байгаа.