ТӨСӨВ 2025 | Төсвийн ажлын хэсэг 2.3 их наядын хэмнэлт хийжээ

УИХ-ын даргын захирамжаар байгуулагдан ажилласан Төсвийн ажлын хэсгээс олон нийтэд товч мэдээлэл өглөө. 

Энэ үеэр ажлын хэсгийн гишүүд "Энэ удаагийн төсөв өмнөх төсвөөс 2.3 их наядаар хэмнэлт хийгдэж, улсын төсөвт алдагдалгүй орж ирсэн. Цаашид улсын төсөвт тулгамдаад байгаа, үр ашиггүй төслүүдэд бодлогын шинэчлэлтийг хэрхэн хийх вэ гэдэгт анхаарч ажилласан. 

Засгийн газрын 27 тусгай сан байна. Үүнээс 13 нь өөрийн гэсэн хуулийн зохицуулалтай байна. Бусад 14 нь Засгийн газрын тусгай сан дээр зөвхөн нэр дурдагдах төдий зохицуулалт хийгдээд явж байгаа. 

Гадаад зээл тусламжаар 89 төсөл хэрэгжүүлж байна. Энэ бүхнээс хувийн хэвшлийн санхүүжүүлэх боломжтой төслүүдэд гаднаас зээл авахгүй. 

Энэ удаад хорт хавдрын өвчлөл, хүүхдийн боловсрол тал дээр түлхүү ажиллаж байгаагаараа онцлог байлаа. Энэхүү ажлын хэсэг 74 тэрбум төгрөгийн орон зай гаргасан. Үүнд 31.4 тэрбум төгрөгийг хүүхдийн үдийн хоолыг 10 хувь танасан байсныг эргүүлэн оруулахад, түрээсийн сургууль, цэцэрлэгийн зардлыг танасан байсныг эргүүлэн оруулахад 20 тэрбум тус тус төсөвлөсөн. 

Манай улс хавдрын өвчлөл, нас баралтаараа дэлхийд тэргүүлж байгаа. Иймд Хавдрын үндэсний төвийн засварын ажлыг бүрэн гүйцэтгэх хөрөнгө оруулалтыг нэмэгдүүлж, хөрөнгө оруулалт гарвал шинэ хавдрын эмнэлэгтэй болох тал дээр санал гаргалаа. Яг одоо чуулган дээр эдгээр саналуудаа хураалгаад явна" гэлээ.