Р.Сэддорж: Зээлийн хүү өндөр байгаа нь иргэдийг бухимдуулж байна

УИХ-ын Эдийн засгийн байнгын хороо, Хууль зүйн байнгын хорооны мягмар гаригийн хуралдаанаар Санхүүгийн зохицуулах хорооны дарга, орон тооны бус гишүүн, Санхүүгийн зохицуулах хорооны Хяналтын зөвлөлийн дарга, гишүүн, Монголбанкны Мөнгөний бодлогын хорооны орон тооны бус гишүүн, Монголбанкны Хяналтын зөвлөлийн дарга, гишүүн, Үндэсний статистикийн хорооны зөвлөлийн гишүүний албан тушаалд нэр дэвшигчийн томилгооны сонсголыг хийлээ.

Нэр дэвшигчдээс байнгын хорооны гишүүд асуулт асууж хариулт авсан. Тухайлбал, Д.Энхтүвшин  мөнгө угаахтай холбоотой гэмт хэргийн тухай, Ч.Мөнхсоёл  санхүүгийн зах зээлийн нэг тулгуур учраас авлигыг бууруулах, иргэдийн итгэлийг нэмэгдүүлэх, чухал зөвшөөрлүүдийг өгөхдөө ил тод байдал, шударга өрсөлдөөнийг бий болгох чиглэлд хариуцлагатай ажиллахыг захив.

Байнгын хорооны дарга, УИХ-ын гишүүн  Р.Сэддорж  "Гишүүдээс нэг зүйл цухалзаж байгаа нь шинэчлэл, өөрчлөлт. Мэдээж одоо байгаагаа болоод байна гэж бодох нь сайн зүйл биш. Алдаа гаргахгүй явах чухал. Үүнд хэт хичээж, ард иргэдэд  боломж олгох, чирэгдэл учруулахгүй байхад анхаарах учиртай. Хамгийн гол нь зээлийн хүү өндөр байгаа нь иргэдийг бухимдуулж байгаа. Энэ талаар бодлого, зорилт тавьж ажиллаарай. Цахим тоглоомын асуудалд анхаарч, иргэд хуримтлуулсан мөнгө, хөрөнгөө алдаж буйд анхаараарай” гэв.