О.Алтангэрэл: Хүүхдийн асуудалд онцгойлон анхаарал хандууллаа

Монгол Улсын Засгийн Газрын өнөөдрийн (2025.05.07) хуралдаанаас гаргасан шийдвэрүүдийг танилцууллаа. 

Энэ үеэр Хууль зүй, дотоод хэргийн сайд О.Алтангэрэл "Өнөөдрийн хуралдаанаар хүүхдийн асуудалд онцгойлон анхаарал хандууллаа. Тэр дундаа Гэр бүлийн тухай хуулийг өргөн барьж батлуулах, Хүүхэд хамгааллын чиглэлийн үйл ажиллагааг идэвхжүүлэх, хүүхэдтэй холбоотой хэрэг хянан шийдвэрлэх процессийг боловсронгуй болгож хүүхдийн эрхийг хамгаалах чиглэлд Хууль зүй, дотоод хэргийн яам, хууль сахиулах байгууллагууд онцгой анхаарч ажиллах, шаардлагатай хууль, дүрэм журмын судалгааг хийх, зохих арга хэмжээг авч ажиллахыг Хууль зүй, дотоод хэргийн яамны сайдад даалгалаа. 

Мөн олон улсын дипломат төлөөлөгчийн газруудын аюулгүй байдалтай холбоотой асуудлуудын талаар авч хэлэлцлээ. Монгол Улсын нутаг дэвсгэр дээр байгаа иргэн харьяалал харгалзахгүйгээр хамгаалагдах ёстой. Тиймээс дипломат төлөөлөгчид, олон улсын байгууллагуудын харуул, хамгаалалттай холбоотой аюулгүй ажиллагааны асуудалд анхаарал хандуулан ажиллах, мөн Монгол Улсын иргэд хуулийн хамгаалалт дор эрүүл, аюулгүй орчинд өөрсдийн амь нас, эрүүл мэндийг хамгаалахтай холбогдуулан зохих арга хэмжээнүүдийг авч ажиллахыг Хууль зүй, дотоод хэргийн сайдад даалгалаа" гэлээ. 

Хүүхдийн төлөө Үндэсний зөвлөлийн хуралдаанаас гарсан саналд үндэслэн Засгийн газрын гаргасан шийдвэр
 

• Хүүхдийн төлөө сангийн зарцуулалт, менежментийг сайжруулж, хөрөнгийг  арвижуулах саналаа бэлтгэж, дараагийн хуралдаанаар шийдвэрлүүлэх,
   
• Монгол Улсын Засгийн газар 2026 оныг “Боловсролыг дэмжих жил” болгон зарласантай холбоотойгоор хүүхдийн хөгжил, хамгааллын асуудлаарх цогц бодлогыг тодорхойлох, бүс, орон нутгийн онцлогт тохирсон дөрвөн улиралд ажиллах хүүхдийн зуслан барьж, байгуулах ажлыг үе шаттай хэрэгжүүлэх,
   
• Хүүхэд өөрсдөө оролцдог оролцооны байгууллагуудын зөв оролцоо, хамтын ажиллагааны механизмыг зөв тодорхойлж, хамтран ажиллах,
   
• Хүүхдийн эсрэг хүчирхийлэл, бэлгийн хүчирхийллийн гэмт хэргийн шалтгаан, нөхцөл байдал, түүнийг таслан зогсоох, авч хэрэгжүүлэх саналыг дараагийн хуралдаанд танилцуулах, 
   
• Гэр бүлийг дэмжих тухай хуулийн төслийг боловсруулж, танилцуулах,
   
• Хүүхдийн эрхийг хангах, хүүхэд хамгааллын үйлчилгээг шуурхай үзүүлэх нөхцөлийг бүрдүүлж, хүүхэд, гэр бүлийн хөгжлийн орон нутгийн байгууллагуудыг автомашинаар хангах ажлыг улсын болон орон нутгийн төсвийн хөрөнгөөр 2025, 2026 онд бүрэн шийдвэрлэх,
   
• Хүүхдийг эхийн хэвлийд байхаас нь эрүүл мэндэд нь анхаарах, жирэмсний хяналт, цэцэрлэг, сургуулийн хүүхдийн эрт илрүүлгийн тогтолцоог бүрдүүлж, цэцэрлэг, сургуулийн орчны эрүүл ахуй, аюулгүй байдалд анхаарах, одоо хэрэгжүүлж буй ажлаа эрчимжүүлж ажиллахыг холбогдох албан тушаалтнуудад даалгалаа.