САЙД & SAD | Зам, тээврийн салбар “ДЭЛГЭР” бөгөөд “САЙХАН” хөгжсөнгүй

Их хуралд Б.Дэлгэрсайхан гэж гишүүн бий. Сүүлийн 9 жил гишүүний суудлаас салаагүй. 9 жилийн урд Т.Бадамжунай шиг хөшигний цаана мөнгө чулуудаад сууж байсан энэ хүн Үндсэн хуулийн өөрчлөлтөөр ордны сандал суудлаас ер салаагүй.

Өөрөөр хэлбэл, 76-гаас 126 гишүүнтэй парламентын аль, алинд хөмсөг зангидаад сууж байсан гэсэн үг.  Одоо тэр Үндсэн хуулийн өөрчлөлт, 126-гийн “автор” Зандан даргын кабинетад багтаж, Зам, тээврийн хөгжлийн сайд боллоо. 

Гэвч Б.Дэлгэрсайхан сайд боллоо гээд зам тээврийн салбар дэлгэр бөгөөд сайхан хөгждөггүй нь хувь заяаны шоглоом гэлтэй.

Дарханы замыг хар. Олон жил дуншиж, дуншиж стандартын шаардлага хангаагүй, олон эргэлттэй зам зорчигчдын хараалыг идээд байж л байна. Төмөр замын эргэлтийн хурдаар Азийн түвшинд бүү хэл Төв Азийн станы хэдэн улсын түвшинд ч хүрч очиж чадаагүй байна. Дээрээс нь энэ салбар хойд хөршийн тоглоомын дүрмээр зохицуулагддаг.

Боомт холбосон энэ тэр бол түүнтэй түүнгүй холбогдчих байсан асуудал. Их гүрнүүдийн шийдвэрийг баян түшээтэй холбож ойлгох нь зүйд нийцэхгүй.

Сүүлийн таван жилд автозамын сүлжээний нийт урт нэмэгдсэнгүй. Түүнийг сайд болсноос хойш 111,916.7 км гэдэг тооноос урагш ахиагүй гэсэн үг. Иргэний нисэхийн салбарын орлогын тоо нэмэгдсэн ч, зарлага нь дагаад өссөн саар үзүүлэлттэй сууна.

Хамгийн эмгэнэлтэй нь гэвэл, нислэгт тэнцэх чадвар бүхий гэрчилгээтэй нисэх онгоцны тоо 2022 онд 54 байсан бол 2024 онд 31 болж буурчээ.

Соёлт ертөнцөд бол тухайн салбарын сайдыг салбарын статистик өсөдтөөр дүгнэдэг. Манайд харин эсрэгээрээ байх юм. Японы хүнс, хөдөө аж ахуйн сайд сонгины үнийн өсөлтөөр огцорсон. Нидерландйн Засгийн газар мөрийн хөтөлбөрийн хэрэгжилт тааруу гэдгээр огцорлоо. Засаглалын хямралаас болж бүдэрсэн Өмнөд Солонгосын Засгийн газар одоо байгуудагдана. Тэнд лав өмнөх засагт нь сайд байсан этгээд дахин сайдын суудалд суухгүй юм шиг байна.

Гэтэл манайд хоёр засгийн “нүүр”-тэй сайд зам, тээврийн салбарыг хөгжүүлнэ гэнэ. Лав л сүүлийн хэдэн жилийн статистикаар энэ салбар өөдлөөгүй. Зандан даргын өнгөн дээр гэнэт л суга өсдөггүй юм бол ойрын хэдэн жилдээ эерэг үзүүлэлт хүлээгээд нэмэргүй. Ямартай ч хойд, урд хөрштэйгөө босоо хэвтээ тэнхлэгээр төмөр замаа ч, автозамаа ч холбох их ажил хүлээж буй.