Авто тээврийн дугаар солих, шилжүүлэхийг хориглолоо

Энэ сарын 21-нд авто тээврийн хэрэгслийн улсын дугаарыг солих, шилжүүлэх, дугаартай машинд шинэ дугаар олгохыг хориглох тухай тушаалыг Авто тээврийн газраас гаргасан. Ямар шалтгаанаар дээрх шийдвэр гаргасан талаар Авто тээврийн газрын Хяналт шалгалт хэлтсийн дарга С.Батболдоос тодруулахад “Тээврийн хэрэгслийн улсын дугаарыг зарим хүн бизнес болгон хувиргаж байгааг таслан зогсоох зорилготойгоор энэ тушаалыг энэ сарын 21-нээс мөрдөж эхэлсэн. Улсын дугаартай машиныг нийслэлээс аймагт, аймгаас нийслэлд шилжүүлэхийг зөвшөөрнө.  Аймаг, нийслэл дотроо дугаар шилжүүлэхийг хориглоно. Монгол Улсын хилээр оруулж ирээд улсын дугаар аваагүй авто машинд шинэ дугаар олгох ажил хэвээр байгаа. Харин дугаар бүхий машинтай хэрнээ шинэ сери задлахад өөртөө таалагдсан дугаар авах сонирхолтой хүмүүст дахин дугаар олгохгүй” гэв.